Krismas vuakvetah khauh zawkin Hâlpuah leh hâlmawi khap dawn

Kumin Krismas leh kum thar vuakvêta hâlpuah leh hâlmawi chi hrang hrang khap chungchangah nimin khan Home minister R Lalzirliana hoin a pisaah sorkar hotute leh Central YMA hruaitute an ṭhukhawm a; R Lalzirliana chuan, kum dang aia khauh zawkin hâlpuah leh hâlmawite khap a nih dawn thu a sawi.

Home Minister chuan hâlpuah leh a kaihhnawih thil dang khap chungchangah mipui zau zawka zirtir ṭul a tih thu sawiin, "He khapna hi kum dang aia uar leh uluk zawka kalpui a ni dawn. Kum danga tih ngai loh, School Education leh Higher & Technical Education department kaltlangin sikul leh college-ah zirlaite zirtir tum a ni a, Mizoram Kohhran Hruaitute Committee kaltlangin kohhran tinah puangzar tura ngen a ni," a ti.

Hâlpuah leh hâlmawi hâl chu hriselna atana thil ṭha lo a nih avangin Supreme Court pawhin a khap tih sawiin Home Minister chuan, hlim tlang taka mi tinin hunpui an hman theih nan hâlpuah leh hâlmawi lam chi reng reng hâl lo turin Mizoram mipui a ngen.

Meeting-a tarlan danin, district tina Deputy Commissioner-te'n an huam chhungah hâlpuah leh a kaihhnawih leh silai lem a mu kâp chhuak thei lak luh, zawrh leh hman khapna thupek an tichhuak a; Mizoram sorkar hnuaia checkgate zawng zawngah state pawn aṭanga lo tura ven a ni a, BSF leh Assam Rifles-te pawh venpui tura ngen an ni.

Kum dangah in chung záwla hâlpuah leh hâlmawi hâl chíng an awma hriat a nih avangin meeting chuan, a hâltute chauh ni loin, in neitute pawhin mawh an phur dawn tawh thu an tarlang.

District tina DC leh SP-te'n village council leh tlawmngai pawlte nena ṭanghoin khua leh veng tinah khapna thupek an puangzar ṭan tawh a; AMC kaltlangin local council-te pawh thupek hi mipui hnena puang zar tura hriattir an ni.

Social media lama thehdarh turin hâlpuah hâl ṭhat lohzia tihlanna video clip tâwi leh animation siam tum a ni a; video clip siam chu Information & Communication Technology (ICT), Information and Public Relations (IPR) department-te leh Central YMA kutah an dah.

Meeting-ah hian Home depart­ment hotu te, district tina DC leh SP leh an aiawh te, Taxation depart-ment, AMC, ICT, Fire & Emergency Services hotute leh Central YMA hotute an tel a ni.