Rualbanlote Ni pualin hun hmang

Nimin khan Mizoram hmun hrang hrangah International Day for Persons with Disabilities puala hun hman a ni a; Aizawlah chuan Zarkawt Recreation Centre-ah School Education minister H Rohluna hoin hman a ni.

Rualbanlote Ni hi December 3 kha a ni a, Pathianni a nih avangin nimin khan hman a ni.

H Rohluna chuan, ruabanlote chu tun hma chuan kan khawtlangah dinhmun hniam zawkah dah ṭhin an nih thu sawiin, "Tunah erawh chuan kan changkang tawh a, kan ngaihdan kan thlak tawh a, theihna bik nei angin kan pawm tawh. Rualbanlote thiamna leh theihna hai chhuahsak hi kan tih tur a ni a, mi ṭhahnemngai tak tak, hlâwkna ûm loa rualbanlote tana inpe an awm a, anni hmalakna avangin mipui pawhin kan hmuh dan a danglam hret hret a ni," a ti.

School Education Minister sawi danin, RMSA hmalakna hnuaiah rualbanlote tan district tinah resource room a awm a, chutah chuan eye screening, speech training, hearing trial leh physical therapy tihsak ṭhin a ni.

Rualbanlote ni pual hun hi Social Welfare department, RMSA, SSA, SCERT, National Institute for Locomotor Disabilities-North East Regional Centre, Health department, Spastic Society of Mizoram, Differently Abled Society, Mizoram Blind Society leh Zoram Entu Pawl ten an huaihawt a; thupui chu, 'Transformation towards sustainable and resilient society for all' tih a ni.

Day puala inkhawm hman zawhah Special Olympic hman chhun­zawm a ni a, rualbanlote wheelchair race, musical chair, spoon race, three legged race, dead ball leh football hmangin intihlimna hun an hmang a ni.