Blind Society-in lawmthu an sawi

Mizoram Blind Society (MBS) chuan thuchhuah siamin, World Disabled Day, December 3 pualin Mizorama mitdelte leh pianphunga rualbanlo zawng zawng duhsakna chibai an bûk a; rualbanlote tana hma latu leh tha, sum leh pai thawhtu zawng zawng chungah lawmthu an sawi.

MBS chuan, rokhawlhna eng emaw vanga kum khat chuang Persons with Disabilities (PwD) Commissioner Mizoramin a neih loh hnuah October 2017 aṭanga Mizoram sorkarin full time Commissioner a dah ta chu lawmawm an tih thu an sawi a, "Mizoram sorkar chungah lawmthu kan sawi," an ti.

Mizoram sorkar Gazette 2007 leh 2011-in mitdel (blind) leh rualbanlohna nasa zawk (both leg affected)-te tan group A leh B officer hna, MCS leh lecturer post-te apply a phal loh hnuah, Governor leh Chief Minister hmalaknain Mizoram gazette hmasa pahnih chu siamṭhat a ni a, kum 2017-a Mizoram gazette tharah chuan mitdel leh ke pahnih ṭha lote tan group A aṭanga D thlenga thliar hranna awm loa hna dil phalsak an ni ta chu lawmawm an tih thu an tarlang.

Tuna an vei ber chu Mizoram sorkarin PwD Act-in a phût anga sorkar hna 3% rualbanlote tana zuah a nih thu sawiin MBS chuan, tunah chuan Mizoram sorkarin thawktu tur a lak thar reng rengin mitdelte leh rualbanlohna nasa zawk (severe disabled)-te a thlauhthla a, rualbanlohna tlem zawkte a duhsak zawk zel ṭhin niin an sawi a, "PwD tana hna recruit dawn reng rengin rualbanlo certificate nei an punga an tam viau mai ṭhin hi thil felhlel tak a ni. Rualbanlo quota hi rualbanlohna, a tlem berah 40% tal nei tling phalote tan chuan dil theih a ni lo," an ti.