Village Council inkhawmpui buatsaih

Village Council Conference cum Panchayati Sammelan, ni hnih awh tur chu nimin khan Aizawl district tan Synod Conference Centre-ah ṭan a ni a, Rural Development minister R Lalzirliana leh Local Admi­nistration minister PC Lalthanliana ten an hmanpui.

R Lalzirliana chuan, sor­karin ram hmasawn leh chang­kanna tura ruahmanna a siamte tihlawhtling turin V/C an pawimawh thu sawiin, "An mawhphurhna an hlen chhuah theih nan thawhhona ṭha neih a ṭul. V/C member-te chu khawtlang mipuiin mi rintlak leh ràwntlaka an ngaih an thlan an nih angin, ngaihtuahna leh rilru sûkthlêk pawh a ṭha lama mipui hruai thei tur an ni," a ti.

PC Lalthanliana chuan, khawtlang roreltu mawhphurh­na pawimawh tak tak neitute'n hma an sawn lehzualna tur inzirtirna hun buatsaih a ni chu lawmawm a tih thu sawiin, "Rah ṭha a chhuah ngei ka ring," a ti a; ruahmanna leh hmalakna reng reng chu a bulṭhut a fuh loh chuan a zîktluak thei lo tih a sawi.

Conference hi Ministry of Panchayati Raj-in Rashtriya Gram Swaraj Abhiyan (RGSA) scheme hnuaiah Mizorama State Institute of Rural Development & Panchayati Raj leh LAD-in an buatsaih a ni a; nimina conference bik hi Aizawl district-a V/C zawng zawng tan niin, district tinah la buatsaih zel tur a ni.

Aizawl disitrct-a V/C thawk ṭha thlan chhuahte hnenah lawmman hlan a ni a; pakhatna Maubuang V/C, pahnihna Darlawng V/C leh pathumna Rulchawm V/C an ni. V/C ṭha thlan nan hian estimate zûlzuia hna an thawh dan te, account bu leh asset vawn dan te, faina lama khawtlang hmasawn dan te, khawtlang inrelbawl dan te, thawhhona ṭhat leh ṭhat loh leh RFD-te tehfungah hmang a ni.