Kolasib DC-in ruihhlo a hâl ral

YMA Sub-Headquarters, Kolasib hmalakna hnuaia zu leh ruihhlo mante chu nimin khan Diakkawn Vengah Kolasib district bawrhsap R Zarzosanga'n a hâl ral.

Zarzosanga chuan, zu leh ruihhloin Mizoram ṭhalai leh pavalaite nunna tam tak a suat tawh tih sawiin, "Ruihhlo hian ngaihsamna a thlan a, chu chuan HIV/AIDS natna nasa takin a tihpun phah a ni. Ruihhlo do kawnga YMA Sub-Hqrs hnuaia SRS, kohhran hrang hrangte leh NGO hrang hrangte hmalakna a fakawm hle a ni," a ti.

Ruihhlo hâl inkhawm hi Kolasib Sub-Hqrs. YMA pre­sident C Liankunga'n a kaihruai a; Kolasib khawpuia branch YMA, MUP, MHIP leh kohhran hrang hrang hruaitute an tel.

Nimina ruihhlo hâl ral leh tihchhiatte hi sap zu ûm 384.5, rakzu ûm 14 leh fûn riat, beer ûm 72, heroin chhin sen 410 leh nitrozepam mûm 450 a ni a; tualchhunga an hralhna ang chuan Rs. 6,96,000 hû a ni.