KHAWTHLIR

NDA-ah tling
Tun hnaia National Defence Academy (NDA) result chhuakah Lalrinawma Sailo s/o Saihmingliana Sailo, Chanmari, Aizawl leh Malsawmzuala s/o K Lalthawmmawia, Zarkawt te an tling. Lalrinawma Sailo hi NDA leh Naval Academy merit list-ah 27-na niin, Sword of Honour a dawng a; Malsawmzuala chu 84-na a ni.

Election training
Durtlang Local Council bye-election neih tur atan nimin khan Aizawl DC conference hall-ah returning officer, assistant returning officer, presiding officer leh polling officer-te tan training buatsaih a ni a; boruak muanawm leh felfai taka inthlan neih a nih theih nana an mawhphurhna tur leh hmalak dan turte hrilh an ni.

Siaha-ah training
Nimin khan Siahaa IPR department conference hall-ah Siaha district-a sentût hri danna pek beihpui thlâk dan tur zirhona buatsaih a ni a, bialtu MLA Dr K Beichhua-a'n a hmanpui. Measles-Rubella (German sentût) Vaccination Campaign-ah hian nausen thla kua aṭanga tleirawl kum 15 inkarte sentût danna pek tur a ni a, Mizoram pumah hri danna la thei mi 3,92,902 an awm a ni.

MEA conference
Mizoram Economic Association chuan nimin khan Aizawl North College-ah Annual Business cum Academic Conference 2017 an hmang. An member Ph.D hmu tharte leh kumina Mizoram University hnuaia BA (Economics) leh MA (Economics)-a ti ṭha ber (topper)-te hnenah lawmpuina thilpek an hlan a; chawhnuah seminar neiin, research paper eng emaw zat an zirho a ni.