Mizoram sorkar hnathawkte'n Ni 3 chhung chawlh an la dawn

Federation of Mizoram Govern­ment Employees and Wor­kers (FMGEW) chuan 7th. Pay anga hlawh pe tura sorkar kar nan vawiin aṭanga December 8, Zirtawpni thleng a huhoin chawlh, mass casual leave an la dawn.

FMGEW hruaitute chuan, a huhoa chawlh an lak tum chungchangah Chief Secretary pawhin a koh tawh thu sawiin, "Sorkar hnathawkte hi mipui rawngbawl kan ni a, hreh tak chungin loh theih lohna avangin chawlh kan lak a ngai a ni. Mipui tihbuai kan duh loh avangin law & order duty, hospital duty leh emergency thila thawkte chu a huam lo ang," an ti a; Mizo mipuite hriatthiamna an ngen.

FMGEW tarlan danin, tun hma aṭangin kum 10 dana sorkar hnathawkte hlawh ennawn chu India sorkar kalphung a ni a; hlawh ennawn tur hian Pay Commission dinin, thil man san chhoh zel dan milin hlawh tihsan ṭhin a ni.

India rama state eng emaw zatin anmahniin State Pay Commission an nei a, chu'ng state-te chuan an hnathawkte hlawh chu Central pay milin an ennawn ve mai ṭhin niin an sawi a; state pay commission-te'n hlawh an ruahman thar ber chu chu Central 7th. Pay mila an duan vek a ni a, tunah an hmang ṭan tawh niin an sawi bawk.

Mizoram chu hmarchhak kil tàwpa awm thil to em emna hmun a nih thu sawiin FMGEW hruaitute chuan, "Kan ṭhenawm state-te'n an hnathawkte hlawh an ennawn vek tawh laia Mizoram sorkar hnuaia hnathawkte hlawh ennawn a la ni ve lo hi lungchhiatthlak kan ti. 7th Pay nawrna atan mass casual leave lak a ngai ta a, pawi kan ti hle a ni," an ti.

FMGEW ruahman dan chuan, December 6-8, 2017 chhung mass casual leave an lakin awmzia a neih loh chuan December 15-ah General Council Meeting koh a, an kal zel dan tur rel an tum. 7th Pay anga hlawk lâk phûtna atan hian Mizoram sorkar hnathawkte chuan badge dum belin pisa an kai tawh a, pen/tool down strike an nei tawh bawk.