Martarte hi Mizoram ropuina an ni - Zoramthanga

MNF party chuan, nimin khan Luangmuala Marter Thlanmualah Mizoram tana martar mi panga ruhro, hmun dang aṭanga an lak thar zalhna inkhawm an buatsaih a; MNF president Zoramthanga'n thu sawiin, "Martarte hian Mizoram ropuina leh zahawmna reh thei tawh lo turin an thisenin an ziak a ni," a ti.

Zoramthanga chuan, martarte ruhro phawrha an la khawm ṭhin hi mi ṭhenkhatin anmahni beih nan an hmang a, martarte chu sawi nêp an tum ṭhin tih sawiin, "Ṭhangtharte zingah kan hnam martarte hlutna a ri ring tawlh tawlh a, Aizawl bomb chungchang pawh ṭhang­tharte'n ni bikah an chhuah ta zel a ni. Kan mar­tarte'n an nunna an pek hi Pathian leh kan ram tan an pe a ni," a ti a; martarte chawimawi chu an mawh a nih thu a sawi.

MNF President chuan, an party-in sorkarna an chan leh chuan Martar Thlan­mual chu martar chhungte zawng zawngin an chhungte martar ruang dah nana an ît vek tur khawpa mawi, ropui leh ṭhaa siam a nih tur thu a sawi bawk.

Martar Thlanmuala nimina ruhro an zalh tâk hi Sgt.Sapliana, Durtlang; Pte. Tanvela, Saron Veng; Pte. Saizikpuiia, Sesawng; Pte. Vanlalthlamuana, Vanchengpui leh, Ral­liana, Keiṭum (Chawng­tleng)-te ruhro a ni. Ruhrote chu an chhungte ngenna leh remtihna veka lak a nih thu MNF chuan an tarlang.