Aizawlah SARAS Fair ṭan a ni

Rural Development (RD) department chuan, nimin aṭang khan Assembly Annexe building-ah Sale of Articles of Rural Artisans Society (SARAS) Fair an buatsaih ṭan a, RD minister R Lalzirliana’n a hawng. Fair-ah hian RD block hrang hranga self help group (SHG) hrang hrangte'n an thil thar leh siam chhuahte an zuar a ni.

SARAS Fair hawngtu R Lalzirliana chuan, sorkarin SHG kaltlanga mi retheite chawikanna tur National Rural Livelihoods Mission (NRLM) hnuaiah state tina SHG-te enkawltu turin Mizoram State Rural Livelihoods Mission (MzSRLM) a din tih sawiin, MzSRLM chuan Kolasib, Serchhip, Mamit, Lawngtlai, Champhai leh Siaha district-a RD block tinah hma a la mek tih a sawi a, "A tahtawla hma zauh zelin, kum 2022 hmain Mizorama district zawng zawng tuam chhuak turin ruahmanna a siam a ni," a ti.

RD Minister chuan, NRLM leh MzSRLM-te chu Mizoram sorkarin a ngai pawimawh tih sawiin, "SHG kaltlang hian mi rethei chhungkaw tam tak tan hmasawnna nghet leh bulfûk zawk a thlen ngei ka beisei," a ti a; RD department hnuaia SHG member-te theihna hai chhuak tura SARAS Fair buatsaih ṭhin chu an tan hlâwkna leh chona ṭha zawk siamtu a nih a beisei thu a sawi.

R Lalzirliana chuan, lo neitu hmei­chhiate hamṭhatna atana hma latu tur Mahila Kisan Sashaktikaran Pariyojana (MKSP) chu Kolasib leh Serchhip district-a RD block pali - Thingdawl, Bilkhawthlir, Serchhip leh East Lungdar block-ahte kalpui a ni tawh tih sawiin, SHG member 5,000-ah bul ṭan tur a nih thu a sawi a, "Ṭhalaite tana kut themthiamna leh eizawnna ngêlnghet pe thei turin DDU-GKY pawh kalpui mek a ni a, thingtlanga chêng ṭhalaite'n eizawnna tlaka an thiamna tah hriamsak leh hna hmuhsak thlengin hma a la dawn a ni," a ti.

RD Minister chuan, SHG rintlak taka kalpuite'n hamṭhatna dang pawh an hmu zel dawn tih a sawi a; SHG-te châkkhai lam nan, damdawi-in an pan nan leh an eizawnna ṭanpuitu atan motor 18 lei a ni a, SHG-te hnenah pek a nih tawh thu a sawi bawk.

SARAS Fair hawnnaah hian MLA pasarih - JH Roṭhuama, Lt.Col ZS Zuala, TT Zothansanga, RL Pianmawia, John Siamkunga, Lalrobiaka leh Chalrosanga Ralte te pawh an tel.

A hawnna inkhawmah hian lawmman pathum sem a ni a; chu'ngte chu village organisation ṭha ber Bilkhawthlir North, SHG ti ṭha ber Women Seven Star (North Vanlaiphai) leh Jeptha, Keiṭum te, SHG hmasawnna tura thawh hlâwk ber bank-ah Mizoram Rural Bank, Thenzawl manager Lalniliani Pautu te a ni.

SARAS Fair hi Mizoramah kum 2015-ah buatsaih ṭan a ni a, kumina mi hi a ṭum thumna niin, Kolasib district leh Aizawlah buatsaih a ni. Tun ṭum Fair-ah hian RD block 17 aṭangin SHG-te'n an thil thar leh siam chhuah chi hrang hrang an pho a, stall 102 siam a ni a; December 16, Zirtawpni thleng a awh ang. Kum danga la tel ngai lo zingah Chawngte, Lawngtlai, Bungtlang South, Siaha, Ngopa leh Reiek RD block-te an tel.