Aizawl bawlhhlawh senghawi dan tur sawiho

State Investment Program Management and Implementation Unit (SIPMIU) leh Aizawl Municipal Corporation (AMC) hotute chuan, nimin khan AMC conference hall-ah Aizawl khawpui bawlhhlawh senghawi leh sâwngbâwl dan tur an sawiho a, AMC deputy mayor Lalringliana'n a kaihruai.

SIPMIU project director Valbuanga'n Aizawl bawlhhlawh suma chantir thei tura SIPMIU-in tunlai khawl ṭha hman dan tur an zir chian tawhnate leh organic waste converter machine chungchang a sawifiah a; organic waste converter machine chu an zir chian hnuah, belh tlak a nihzia leh leiṭha a siam chhuah pawh chemical pawlh loh a nih thu te, khawl hian bawlhhlawh ṭawih thei aṭangin darkar 24-36 chhungin leiṭha a siam chhuah theih thu a sawi.

Meeting-ah hian Aizawl khawpui bawlh­hlawh, ṭawih thei leh ṭawih thei lo thliar hran leh sawngbawl dan tur te, SIPMIU-in AMC hman tura bawlhhlawh phur motor 54 a hlan tawh leh hman mek hmanga bawlh­hlawh ṭawih thei leh ṭawih thei lo thliar hran dan turte an sawiho a; Tuiriala Resource Center awm sa hman ṭangkai dan tur te, Aizawla veng tin bawlhhlawh paih man chung­changte an sawiho bawk.

Meeting-ah hian AMC councillor te, PHE leh UDPA department hotute leh Mizoram Pollution Control Board hotute an tel a ni.