CM thar duhin mipui an tuihâl - MPC Sr. Vice President

MPC chuan nimin khan an party pisaa Durbar Hall-ah inkhawm an nei a; MPC senior vice president Vanlalhlana'n thu sawiin, Mizoram mipuite chu an la hrawn ngai loh chief minister neih duhin an tuihâl a, an rilṭám niin a sawi.

Vanlalhlana chuan, Congress leh MNF party mite ngei pawh chief minister thar neih duh an nia sawiin, "Chief minister kan la hrawn ngai loh neih an engto tlat mai hi CM thar neih duhnaah mipui kan lo tuihâl tlang a ni tih a hriat hle a ni," a ti.

Mipui beisei leh nghah­fâk tihhlawhtlinsak turin MPC leh ZNP-te chuan party mal angin an thei dawn lo tih an hriat thu sawiin Vanlalhlana chuan, "Mipui tuihâlna phuhrûksak ngei chu kan tihmâkmawh a nih si avangin kawng kan dap a, MPC, ZNP leh ram veitu pawl hrang hrang intêlkhawmte chuan mipui beisei leh innghahna tling zo tur ṭangrual pawl, Zoram Peoples' Movement kan din ta a ni," a ti a; ZPM chu thla hnih chauh­a upa a ni chungin party dangte'n an huphurh hle tawh niin a sawi.

MPC Sr. Vice President chuan, ZPM-a ṭang­ruala thawkhote chu duh leh tum thuhmun an nih thu leh an inpumkhat ṭhat thu a sawi a, "ZPM aṭang ngei hian mipuite beisei leh nghahfâk CM thar buaina leh harsatna awm loin kan hring chhuak ngei ang tih beiseina sang tak neiin kan thlir mek a ni," a ti.