World Soil Day hman a ni

College of Veterinary Sciences & Animal Husbandry, Selesih-a KVK bultumin nimin khan Central Agricultural University (CAU) conference hall-ah World Soil Day hman a ni a, Planning Board vice chairman H Liansailova khuallian a ni.

H Liansailova chuan, Mizorama eizawnna hmun hrang hrang­ah leh sorkar hnaah hmeichhiate'n nasa takin hma an sawn a, mipate an ṭan a ṭul hle thu a sawi a; huan thlai siamte a zau zawng ni loin, a thar tam zawngah ṭan a ngaih thu sawiin, "Mithiamte râwn ṭhin leh an sawi anga tunlai thiamna nena hma kan lak a ngai," a ti.

CVSAH dean Dr Lalnuntluangi Hmar pawhin thu sawiin, leilung chu mihringte nunna hnár a nih avangin duat a ngaih thu a sawi a, "Thlai chìn theihna 12% chauh kan neih hi kan duat a, a mamawh tâwk chaw ṭha kan pek a ngai a ni," a ti.

World Soil Day hmannaah hian Phulpui, Melriat, Zemabawk, Sihphir, Durtlang , Nausel leh Muthi aṭangin lo neitu mi 100 vel an tel a; chawhnu lamah technical session hman niin, lei endik tur lak dan leh vermicomposting (changpât hmanga leiṭha siam dan a takin an inzirtir a ni.