Mipui himna chungchang sawiho

Kolasib district mipuite'n him leh rálmuang taka Krismas leh kum thar an lawm dan tur ngaihtuahin December 5, 2017 khan Kolasib District Security Committee chu an chairman R Zarzosanga, district bawrhsap hoin an ṭhukhawm.

Meeting-a chuan, Krismas vuakvêta Police, Excise & Narcotics leh Magistrate-te duty dan tur a ngaihtuah a; kum danga an lo tih ṭhin angin, sorkar thâ tichak turin tlawm­ngai pawlte theihtawp chhuah leh tura ngen ni se, an ti. Biak-in, khaw­tlang leh media kaltlangin nasa zawka inzirtirna leh inhrilhhriatna nei tura ngen an rêl bawk.

Kolasib district chu Mizoram luhká a nih avang­in, Vairengte checkgate-ah ruihhlo, hâlpuah, hâlmawi leh silai lem, a mû kâp chhuak thei chi tawlhrûk awm theite khauh taka enfiah ṭhin an rel.