Bru lâk lêt dan tur sawiho

Kolasib DC R Zarzosanga hoin December 5, Thawhlehni khan DC conference hall-ah March 2018-a Tripura-a Bru refugee camp-a awmte Mizorama hruai kîr dan tur ngaihtuah a ni.

Meeting-a tarlan danin, Bru hruai kîr turte hian Kanhmun-Zamuang-Bairabi kawng an zawh ang a, Bairabi chu staging area (zan khat riahna tur) tur niin, chumi hnuah an awmna tur khaw 10-ah sem darh tur a ni.

Chenna tur hmun nghet an neih hmaa chenna tur lailâwkna (temporary shelter) siamsak an ni dawn a, an awm nghehna tur chu chawlhkar khat chhunga peih tura beisei niin, a buaipui turin Home department aṭangin liaison officer leh district level aṭangin administrative officer 10 leh supporting staff pathum ruat a ni. Sorkar official-te puibâwm turin V/C leh NGO hruaitute ngen ni se, an ti.

March 2018-a Kolasib district-a awm tur Bru lâk lêt turte chu Tripura-a camp paruka chhungkaw 824 an ni a, Kolasib district chhunga khaw 10-a sem darh tur a ni. Bru lak letnaa zinna senso, chenna in sakna tur, chen lailâwk na tur, ration leh a kaihnawih dang atana senso tur chu Rs. 1,84,421,317.60 a ni a, district level aṭang­in Home department-ah thehluh tawh a ni.