Tuizem lian pahnih enchhin

State Investment Program Management and Implementation Unit (SIPMIU), Aizawl chuan nimin zing khan Luangmual leh Seventhday Tlanga tuizem (water reservoir) an sak chu an enchhin a, tui an dah lut.

SIPMIU chuan, Aizawl mipuiin hnianghnar zawk leh rualkhai zawka tui an dawn theih nan nasa takin ṭan an la tih tarlangin, Aizawl khawpuia veng hrang hrangah tuizem lian 10 an siam zo tawh a, hmun 20-ah an siam mek bawk tih an sawi a, "Heng zinga sak zawh tawh sa,Tuikhuahtlang main reservoir aṭanga Luang­mual leh Seventhday Tlanga water reservoir-te tui pekna tur pipe phûm chu December 6 hian PHE engineer-te nen en hoin, enchhinna hlawhtling tak neih a ni," an ti.

SIPMIU tarlan danin, Tuikhuahtlang aṭangin Luangmual leh Seventhday Tlanga tuizem lian châwm turin pipe lian (feeder mains) metre 7,500 vela thui an phûm zo tawh a; feeder main hi Tuikhuahtlang aṭangin Khatlaah chhukin, New Secretariat Complex kal­tlangin Tuikual lui a kân a, Seventhday Tlang leh Luangmuala tuizemte a thleng a ni.