Court-in PWD E-in-C hlui Liansanga Thiam loh a chantir, jail-ah dah a ni

Special Judge (Prevention of Corruption Act) Dr HTC Lalrinchhana chuan nimin khan PWD engineer-in-chief hlui Liansanga, Khatla chu eirua puh a nihnaah thiam loh a chantir. Liansanga hi nimin vêk khan jail-ah dah luh a ni.

PRISM hruaitute chuan Kau-Tabung leh Tuipanglui Mini Hydel Project siamnaah sum hman dik loh leh tihchingpen a awm nia hriain October 3, 2008 khan Anti Corruption Bureau (ACB)-ah complaint an thehlut a; ACB-in an chhui chian hnuah an thil hmuh chhuahte Court-ah an thehlut a ni.

Special Court (PC Act) chuan hun eng emaw chen thubuai a ngaihtuah hnuah nimin khan thutlukna a siam a; Liansanga chu IPC Section 409/477A leh PC Act Section 13(2) [read with PC Act Section 13(1)(c)(d)] hmangin thiam loh a chantir a ni. Puh a nihna dang IPC Section 420/34/120B hnuaia thubuai erawh chu a titawp thung.

Liansanga hi bail bond a neih hmuh tur a awm loh avangin Special Court chuan jail-ah dah nghal turin thutlukna a siam a; hrem a nih dan tur chu vawiinah puan a ni ang. Court thupek angin Liansanga hi nimin khan Central Jail-ah dah luh a ni.

Liansanga hi thiam loh chantir a nihna hi Power & Electricity department-ah hotu a nih laia a thuneihna hmang sual leh eirûk thubuaiah a ni a, mi bum leh phiar rùa puhnaah erawh thiam chantir a ni thung.

Kau-Tlabung leh Tuipanglui MHP thubuaiah hian Special Court chuan June 24, 2022 khan Power & Electricity engineer Laldawngliana leh supplier Swopan Kumar Roy chu thiam loh a lo chantir tawh a, kum hnih chhung hrehawm taka táng tur leh an sum tihchingpen zatve, Rs 3,63,000 ve ve chawi turin a hrem.

Kum 2001 khan Tuipanglui leh Kau-Tlabung MHP thawhna sum nasa taka tihpun a ni a; Power & Electricity department chuan kum 2000 hma lamah hna thawh zawh vek tawh a nih thu an sawi thung.

Tuipanglui MHP hi 1992-ah khan cheng nuai 980 sênna tura duan a ni a, kum 1996-ah cheng nuai 1,985, kum 1998-ah cheng nuai 2,985 leh kum 2001-ah cheng nuai 3,721 senna tura tihpun a ni.

Kau Tlabung MHP hi 1994-ah cheng nuai 482 senna tura duan a ni a, kum 1996-ah cheng nuai 2,181, kum 1997-ah cheng nuai 2,519 leh kum 2001-ah cheng nuai 3,253 senna tura tihpun a ni bawk.

Hetiang a nih avang hian PRISM chuan ACB-ah complaint an thehlut a; Vigilance department chuan May 13, 2010 khan engineer rualte lakah criminal case ziak lut turin ACB a hriattir. Mahse, July 2, 2010-ah thubuai hnûk kîr turin Vigilance chuan ACB a hriattir leh thut thung.

Vigilance thutlukna avangin PRISM chuan August 25, 2010 khan Gauhati High Court, Aizawl Bench-ah public interest litigation (PIL) an thehlut a, mahse, hnâwl a ni.

PRISM chuan November 4, 2010-ah restoration petition (PIL tihnun leh dilna) an thehlut a, March 7, 2013 khan Gauhati High Court Principal Bench, Guwahati-ah ngaihtuah a ni a, April 30, 2013 ral hmaa insawifiah turin Mizoram sorkar hriattir a ni.

March 17, 2015 khan High Court chuan criminal case kalpui turin thutlukna a siam a; High Court thutlukna chu Mizoram sorkarin Supreme Court-ah a khing lêt a, Supreme Court chuan High Court thu chu kaltlang turin thutlukna a siam a, ACB-in an chhui nawn leh a ni.