Synod Inkhawmpuia ngaihtuah tur zingah Eirûkna do leh politics siamṭhat rawtna a tel

Mizoram Synod Inkhawmpui vawi 99-na chu Khatla Kohhran biak-inah neih mek a ni a, nimin khan rorel ṭan niin, thu ngaihtuah tur zingah eirûkna leh hlemhlêtna (corruption) do leh politics siamṭha tura hmalak rawtnate a tel.

Synod Inkhawmpui hi Decem­ber 6, Thawh­lehni zan khan ṭan a ni a; nimin chawhma khan moderator kal chhuak Rev.Dr Vanlalnghaka Ralte-in moderator thar Rev.Dr C Chawnghmingliana hnena moderator mawhphurhna a hlan hnuah moderator thar kaihhruaiin rorel ṭan a ni.

Kum 2025-a Synod inkhawmpui neihna atan Chanmari Kohhran biak-in thlan a ni a; kum 2023-a Synod inkhawmpui neihna atan Mission Veng Kohhran biak-in leh kum 2024-a inkhawmpuina atan Mission Vengthlang Kohhran biak-inte thlan a lo ni tawh.

Kum 2023 Synod inkhawmpui moderator atan Rev. R Vanlalghaka thlan a ni a, secretary (senior) atan Upa B Lalhmunliana leh secretary (junior) atan Rev. PB Mankima thlan niin, statistician atan Upa Dr Lalnunsiama Colney thlan a ni. Puipa dangte chu a ngai an ni ang.

Tun inkhawmpuia pastor atana nemngheh tura probationary pastor 15 rawtte chu pawm a ni a, pro. pastor atana lak thar mi 17-te dah­ngheh rawtna pawm a ni bawk.

Synod inkhawmpuia ngaihtuah tura rawtna, general agenda zingah corruption leh a kaihhnawih do, ram hruaitute khalh ngíl tura hmalak, politics siamṭha tura hmalak, Assembly inthlanpui awm tur puala ṭawngṭai rual, inthlanna felfai a awm theihna tura hmalak, Mizoram State Lottery tihtawp leh Mizorama grape thar hmanga wine siamte sacrament wine atana hman rawtnate a tel a ni.

Inkhawmpuiah hian tun kar Inrinni thleng rorel a ni dawn a, Pathianni chawhmaah nemngheh inkhawm neih a ni ang a, chawhnuah Lalpa Zanriah Sakramen ṭheh a ni dawn a, zanah inkhawmpui a ṭiak dawn a ni.

SYNOD INKHAWMPUI GENERAL AGENDA ṬHENKHAT
■ Corruption do leh a kaihhnawih chungchang
■ Ram hruaitute khalh ngíl tura Synod anga chak zawka hmalak rawtna
■ Politics siamṭha tura hmalak chungchang
■ Mizoram Assembly inthlanpui awm tur puala ṭawngṭairual rawtna
■ Inthlanna felfai a awm theihna tura hmalak chungchang
■ Mizoram State Lottery tihtawp rawtna
■ Mizorama grape thar aṭanga siam sacrament wine atana hman rawtna
■ Thil zawrh leh hralhah bûkna leh tehna dik hman chungchang
■ Pian pun chungchanga hmalak rawtna
■ Mizo mipa thi tam lutuk a ziaawm theihna atana hmalak chungchang
■ Mizoramah cancer a tlem theihna tura hmalak rawtna
■ Krismas leh kumthar vuakvêta hâlpuah leh puak thei thil khap chungchang
■ Mizoramin land reform leh land ceiling a neih theihna atana hmalak rawtna
■ Hna thawktute'n rinawm leh dik taka hna an thawh theih nana hmalak chungchang
■ MPF tihchak lehzual rawtna