Sialsukah Zofest 2022 hman mek a ni

MZP Gen.Hqrs buatsaih Zofest 2022 chu December 6, Thawhlehni zan khan Sialsukah ṭan a ni a, Aizawl South-III bialtu MLA Prof. F Lalnunmawia'n a hawng. Nimin leh nizan khan chhunzawm a ni a, minister of state TJ Lalnuntluanga'n a hmanpui.

Zofest-ah hian Mizoram chhung leh pawna Zo hnahthlak hnam péng hrang hrangte an tel a, hnam làm leh leh zaite entir a ni.

Prof. F Lalnunmawia chuan, Mizote chu khawvel hmun hrang hrangah awm rih mah se, rilru leh thinlungah an insuihkhawm zel thu sawiin, "Kan chênna leh awmna hmun danglam vangin ṭawng leh nunphung danglam hlek hlek mah se, inhrethiam tawn zel ila, unau kan ni tih hi a takin i lantir zel ang u. Engtikah emaw chuan rorelna pakhat hnuaiah kan la léng za ang tih beiseina nen hma lam i thlir zel ang u," a ti.

Nimina Zofest hmanpuitu minister TJ Lalnuntluanga chuan, ngaihtuahna dik hmanga dikna leh rinawmna vawn a, hnam tana rinawm leh ṭhahnemngaih a ṭul thu sawiin, "Zo fate hian inpumkhat taka hma kan lakho zel chuan Zo fa zawng zawng hi rorelna pakhat hnuaiah kan awmho hun a la her chhuah ngei ka beisei," a ti.

TJ Lalnuntluanga chuan, mahni hnam hmusit lo a, dah hmasa bertu, chhuang tlattu nih a pawimawh thu sawiin, "Mi neihah buai loin, kan hmabak ṭheuhah thawhrimna nen hlawhtling tura kan beih a ṭul," a ti a; social media hmanga Mizo ram leh hnam chhe ta anga tarlan ṭhinte'n Mizote hnam leh sakhua chungchangah mahni inhmusit khawpin mi a hruai mek tih sawiin, insiamṭhat a pawimawh thu a sawi bawk.

Nimina Zofest hmannaah hian Myanmar rama Chin state chief minister hlui Salai Lian Luai leh MZP president hlui VL Krosshnehzova te pawhin thu an sawi a; MZP president Lalnunmawia Pautu-in 'Chin Kuki Hills Country' tih lehkhabu a tlangzarh a ni.