Parva III-ah ráltlân hruai luh belh

Bangladesh aṭanga ráltlân, Mizoram chhung ramhnuaia hun eng emaw chen awm tawh mi 15 chu Mizo Students' Union (MSU) Gen.Hqrs hruaitute kaihhruaiin nimin khan Parva-III khuaah hruai luh an ni. Bangladesh aṭangin Zo hnahthlâk ráltlân Parva-III khuaah mi 310 an awm mek niin an tarlang.

MSU thuchhuah tarlan danin, ráltlân mi 15-te chu MSU vice president Laldinsanga, Parva-III khawtlang hruaitu te, Tuichawng Group YMA leh Damdep-II khawtlang hruaitute'n an lo dawngsawng. Râltlân lut tharte chu ramhnuaiah ni eng emaw zat an awm tawh a, chaw an nghei rei tawh avangin an chau hle a, an hriselna dinhmun enfiah nghal a nih bakah, Parva-III khuaa sorkar official awmte hnenah hriattir nghal a ni.

An ruala kal ve mi 90 vel erawh chu BSF duty-te'n kut an thlak tih tarlangin MSU chuan, "An ei leh in neih chhunte an tihchingpensak a, rilṭáma thih ai chuan tiin, ei tur an hmuhna tur ngaihtuahin Bangladesh lam an pan leh a ni. An lêtna lamah pitar pakhat chu kalkawngah a boral thu MSU chuan a dawng," an ti a; sahimna zawnga Mizorama luh tumte BSF sipaite'n ramhnuaia thi tura an lettír chu ná an tih thu leh an dem tak zet thu an tarlang.

MSU chuan, Bangladesh-a buaina avangin Zo hnahthlak ráltlânte ram hnuaiah mi 800 chuang an la awm nia hriat a nih thu sawiin, "Himna zawnga Zo fate inpui pana Zo hnahthlak ráltlân mekte hi Mizoram an luh ngei theihna kawnga harsatna awm zawng zawng sukiang thuai turin MSU chuan Mizoram sorkar kan ngen nawn leh a, tunah hian Parva-III khuaah ráltlân mi 310 an awm mek a ni," an ti.

MSU chuan, Bangladesh aṭanga ráltlân rawn lutte himna leh chhawmdâwlnaah Mizoram sorkarin theihtawp a chhuah avangin lawmawm an tih thu an tarlang a; Chin National Organisation-in ráltlânte ṭanpuina tur sum ṭhahnem tak MSU hnenah an hlan thu an sawi bawk.