Kumin chhungin Mizoram Police-in Kuhva rah ip 4,542 an man tawh

Mizoram Police chuan kumin January 1 aṭanga November 30 thleng khan Myanmar aṭanga dan loa kuhva rah tawlh rûk ip 4,542 an man tawh a, thubuai panga an ziak lut tawh. Kuhva rah an man tamna ber chu Mamit district-ah a ni.

Mizoram Police chuan, dan loa Myanmar aṭanga kuhva rah phurh ṭhin tihtàwp a nih theih nan theihtawp an chhuah nia sawiin, mipui thlàwpna an mamawh thu an tarlang a, "Dan loa kuhva rah phur hria chuan mahni kuta dan kenkawh tum mai loin, police leh thuneitute hrilh vat zel ṭhin turin mipui kan ngen thar leh a ni," an ti.

Police thuchhuah tarlan danin, Myanmar aṭanga kuhva tawlh rûk kaihhnawihah kumin chhungin mi pariat man an ni tawh a, mi pasarih lakah thubuai panga ziah luh a ni. Kuhva rah ip 4,542 an man tawh a, chu'ng zinga ip 20 chu a tê (small nylon bag) a ni a; kuhva rah man hlut záwng chu Rs 4,92,79,675 a ni.

Kuhva rahte chu Lunglei, Siaha leh Lawngtlai district tih loh district dang zawngah an man tawh a; an man tam berna Mamit district-ah ip 1,075 man tawhin, chu chu Rs 2,21,25,000 man a ni.