Health Care Scheme-a mipui thawh khawm Rs 7,28,89,880 sorkarin a hmang - ZPM Ṭhalai

ZPM Ṭhalai hruaitute chuan nimin khan Aizawl Press Club-ah thuthar thehdarhtute an kâwm a; Mizoram State Health Care Scheme (MSHCS)-a mipui inziah luhna sum chu damlote tana hmang turin Mizoram sorkar an phût tih an puang.

ZPM Ṭhalai president Dr C Lalrammawia chuan, RTI Act hmangin MSHCS chungchang an zawh thu sawiin, "December 6, 2022 khan chhànna kan dawng a, chutah chuan October 1, 2020 aṭanga vawiin thlengin MSHCS-a inziah luhna sum aṭangin Rs 7,28,89,880 chu sorkar inrêlbàwlna atan hman a ni," a ti.

Dr C Lalrammawia sawi danin, MSHCS-a inziah luhna sum, sorkar inrêlbàwlna atana hman zatve pawh damlo bill atan hman a ni lo. Damlo bill atana hman zat chu Rs 3,21,65,987 a ni a, damlo 1,158-te bill a huam. A bak zawng Rs 7,28,89,880 chu zinna senso, thawktute hlawh, training pekna, office inrêlbàwlna leh thil dang atan hman a ni.

RTI Act hmanga zawhna chhan a nih danin, mipui sum thawh khawm hmangin MNF sorkar hnuaiah MSHCS kalpui nia a lan thu sawiin C Lalrammawia chuan, "Chutih mek laiin, health care hnuaia mipui sum bat erawh ṭhahnem tak a ni a, September 21, 2022 thleng khan damlo 29,302 bill a táng a, pawisa bat zat chu cheng vbc. 80.54 a ni," a ti.

ZPM Ṭhalaiin RTI Act hmanga SEDP hnuaia damlo apiangin an hman turin SEDP-ah Rs 2,00,000 thlenga dah a nih leh nih loh zawhna chu Health department chuan, "SEDP hi MSHCS-in a khawih loh avangin Finance department emaw, Planning department emawah zawt zawk turin MSHCS chuan kan ngen a che," tiin an chhang a ni.

ZPM ṬHALAI ZAWHNA LEH SAWITE
1) CM-in SEDP hnuaia damlo apiangin an dawn tur Rs 2,00,000 kha khawiah nge a awm?
2) Minister leh a hnuaia department hnathawk ṭhahnem tak an awm reng laia nihna inpek duh vanga mipuiin an ngaih, SEDP board 14 enkawlna atana kum tin cheng vbc. 2 chuang sèn ṭhin a nih laiin, eng vangin nge MSHCS inrêlbàwlna atan mipui sum thawh cheng vbc. 7 chuang hman ral a nih?
3) MSHCS-a inziah luhna sum aṭangin Rs 7,28,89,880 chu sorkar inrêlbàwlna atan hman a ni a, damlo bill atan Rs 3,21,65,987 chiah hman a ni
4) September 21, 2022 thleng health care-a damlo pawisa bat zat chu cheng vbc. 80.54 a ni.