Armed Forces Flag Day hman a ni; Governor-in thuchah a tichhuak

Nimin December 7 kha Armed Forces Flag Day a ni a, Sainik Welfare & Resettlement department chuan Aizawl leh district danga Sainik Welfare pisaahte an hmang. Day pual hian Governor Dr Hari Babu Kambhampati chuan thuchah a tichhuak a ni.

Sainik Welfare & Resettlement chuan, Flag Day puala sipai báng leh sipaiin an thihsan an chhungte ṭanpuina tur vehbûr an khawnah Governor, Chief Minister, Assembly Speaker, minister, Chief Secretary leh department hrang hrang secretary-te aṭangin Rs 15,890 an hmuh thu tarlangin, ṭanpuina petute leh Flag Day puala thil siam leitute chungah an lawm thu an tarlang.

Armed Forces Flag Day puala thuchah a tihchhuahah Governor chuan, "Min venghimtu te, kan tana nun hlan tawhtu sipai huaisen, kan pasalṭhate leh tuna kan sipai ni mekte chawimawina leh zahna kan lantirna hun a ni," a ti a; Day pualin ṭanpuina thil pek phal taka pe turin khua leh tuite a sáwm.

Hari Babu Kambhampati chuan, "Kan sipaite zahna kan lantir rual hian, khua leh tuite'n kan sipai huaisen martarte'n an kalsan tâk an chhungkua leh sipai huaisen, ram venhimna atana theihtawp chhuah vanga taksaa harsatna neite ṭanpui a, sum leh paia kan theih ang anga lo ṭanpui hi kan tih tur a ni," a ti.

Mizoram aṭangin sipai huaisen tak tak, ram venhimnaa thawh hlâwk tak tak an chhuak tawh ṭhin tih tarlangin Larsap chuan, "Tun thleng hian India sipai tana thawh hlâwk tak state kan la ni. Kan state aṭang hian nula leh tlangval huaisen leh chhuanawm tak tak, India ram leh Mizoram tihmingṭhatu tam tam lo chhuak tawh a, an la awm mek zel bawk," a ti a; Flag Day pualin kum tin vehbûr khawn ṭhin a nih thu leh kum 2021 khan Rs 70,000 hmuh a nih thu a tarlang.