Robert Romawia'n GAC Fest a hmanpui

Government Aizawl College (GAC) chuan nimin khan Mualpuia an hmunah GAC Fest an hmang a, minister of state Robert Romawia Royte-in hmanpuiin, fest, gym room leh basketball court-te a hawng. Minister chuan, a ṭha zawnga social media hman a nih theih nan mi dangte zirtirna kawnga hmalakpuiah zirlaite a sáwm.

Robert Romawia Royte chuan, tunlaiah thiamna leh hriatna a dang tawh tih sawiin, "Zirlaibu ai mahin social media hman uar a ni tawh a, a hman danah fimkhur a ngai. Thu dik leh rintlak chauh chhiarin post ṭhin ila, social media-in Mizoram a chiah hneh a, kan hman dik loh nasat avangin khawtlang nun pawhin a tuar mek," a ti.

College zirlaite chu an nun dan vawng uluk tura chahin Minister chuan, "Thiamna tak tak nei tur chuan zirtirtute leh zirlaite inkarah inhriatthiam tawnna leh inngaihsak tawnna ṭha a pawimawh," a ti a, inlaichìnna ṭha neia hma lam an pan theih nan ṭan la turin a chah.

Robert Romawia chuan, zirlaite tan rilru hrisel neih mai a tâwk lo a, taksa hriselna neih tel a ngai tih sawiin, "National Education Policy-ah hian sport tih hi vawi 30 zet a inziak a, India sorkarin infiamna a ngaih pawimawhzia a tilang chiang hle. Mizoram sorkar pawhin hma nasa takin a la mek zel a, sikul, college leh university-ah infiamna ṭha dah niin, dah belh leh zel tura hmalak mek a ni," a ti a; Mizoramah HIV/AIDS vei an pung zel chu lungchhiatthlak a tih thu leh invéng tura inzirtirnaah ṭan lak a ṭul thu a sawi bawk.

GAC Fest hi GAC leh Mizoram AIDS Control Society (MSACS) buatsaih a ni a, MSACS hruaitute'n HIV/AIDS laka invenna tur thuchah an sawi.

GAC hi kum 1975-ah din a ni a, tunah hian department pakua awmin, zirlai 2,242, zirtirtu 55 leh thawktu dang 20 an awm mek a ni.