KHAWTHLIR

CM-in External Minister a kâwm
Chief minister Zoramthanga chuan December 6, Thawhlehni tlai khan New Delhi-ah External Affairs minister Dr S Jaishankar a kâwm a; Mizoram mamawh hrang hrang te, ṭhenawm ramte nena inlaichinna tihhmasawn zelna tura Mizoram leh India hmarchhak state-te pawimawhnate bakah, thu pawimawh dangte a sawipui.

Disaster workshop
Mamit District Disaster Management Authority chuan nimin khan Zawlnuam BDO conference hall-ah 'Workshop/Sensitization & Formulation of Village Disaster Management Authority' an buatsaih a; Mizo 4th IR Police-a State Disaster Response Force team-te'n chhiatna a thlena chhanchhuah hna thawh dan an zirtir a, Zawlnuam PHC-a Medical Officer-in first aid hman dan a zirtir bawk.

Zirlai chawimawi
Lunglei South bialtu MLA Dr K Pachhunga chuan December 6, Thawhlehni zan khan YMA, Lunglawn Branch Education Committee buatsaih zirlai ti ṭha chawimawina a hmanpui. Lunglawna HSLC, HSSLC, graduate leh post graduate zo thar zinga ti ṭha mi 41 hnenah chawimawina hlan a ni a, university topper-te hnenah MLA Award hlan a ni bawk.

Serchhipah No Tolerance
Serchhip SP Stephen Lalrinawma chuan, Serchhip khawpuiah December 12, 2022 aṭangin traffic rules bawhchhiate ngaihhnathiamna tel loa enfiah rûnpui, No Tolerance Drive kalpui a nih dawn thu a tarlang. Lirthei khalhtute chu fimkhur taka lirthei khalh tur leh document fel lote chu tifel vat turin a hriattir a ni.

Hâlpuah man
Champhai Police leh YMA, Sub Headquarters, Champhai chuan Lalhmingthangi d/o Vanlalhruaia, Champhai Kanan Veng chenna in aṭangin hâlpuah leh hâlmawi chi hrang hrang, Rs 90,000 chuang hû an man. Lalhmingthangi lakah IPC Section 188 hnuaiah thubuai ziah luh a ni a, a kaihhnawih dangte chhui zui mek a ni. Police leh YMA-te hian Chief Judicial Magistrate aṭanga in dap phalna (search warrant) an neih hnuah Lalhmingthangi in an dap a ni.