ZPM-in sorkarna kan chan chuan Panchayati Raj kan din ang - Faka

Ṭangrual pawl, Zoram Peoples' Move­ment (ZPM) hruaitute chuan, ZPM-in sorkarna an siam a nih chuan, a tak taka mipui sorkar an din theihna atan Pan­chayati Raj an siam tur thu an puang.

ZPM hruaitute hian nimin khan Aizawl Press Club-ah thuthar thehdarhtute an kâwm a; ZPM Val Upa Council (VUC) chairman Lalfakzuala chuan, ZPM-in sorkarna an siam chuan 'Kalphung thar nei mipui sorkar' an siam ang tih an puan tawh thu sawiin, "ZPM chu sorkar kalphung thar nei, a tak taka mipui sorkar a nih theihna atan, Panchayati Raj siam a ni dawn a, India danpuiin rem a tih angin, Mizo khawsakphung nena inmil tura her remin hman a ni ang," a ti.

Lalfakzuala sawi danin, tuna Mizoram sorkar kalphungah chuan mipuiin thuneihna sawi tham an nei lo. Sorkarin engkimah ro a rel a, rorelnaah mipuiin chanvo an nei lo. Hmasawnna lamah pawh hmalak dan tur a tê ber thlengin sorkarin a rel a, ruahmanna siamnaah leh tipuitling tura thawhnaah mipuiin thu leh hla an nei lo a ni.

Democracy-in a ken tel pakhat chu, 'Tualchhung thilte chu tualchhunga mite'n rel se' tih a ni a; mipui chanvo leh mawphurhna tisang tur te, hmasawnna a kal theihna atan leh hmasawnna kawnga mipuite mamawh ang leh duh ang taka hma lak a nih theihna atan Panchayati Raj din ṭul an ti a ni.

Panachayati Raj-ah hian level tinah seat awm zawng zawng aṭanga chhûtin, hmun thuma ṭhena hmun khat hmeichhe tan hauh (reserve) a ni a; president/chairman hna pawh state pumpui thlira hmun thuma ṭhena hmun khat hmeichhe tan hauh a ni.

ZPM VUP Chairman chuan, kum 1992 hma lamah chuan Panchayati Raj chungchanga hmalakna chu Indian Constitution-ah state-te kutah dah a nih thu a sawi a, "Tih ngei ngei tur ni loin, tih atana ṭha ang chauha dah a ni. Tualchhung rorelna hi a ṭul ngawih ngawiha hriatna avangin kum 1992 khan Constitution siam ṭhain, state sorkarte'n an neih ngei ngei tura dah a ni," a ti.

Mizoram pawhin a duh chuan Panchayati Raj a nei ve thei tih sawiin Lalfakzuala chuan, "Nei tur chuan Legislative Assembly-in resolution a pass a ngai a, MLA zawng zawng zatve aia tlem lo leh vote tla hmun thuma ṭhena hmun hnih aia tlem loin an pass chuan hman theih a ni," a ti a; a hmingah pawh duh chuan district council, village council tihte, Mizo hming pawh vuah theih a nih thu a sawi.

Lalfakzuala chuan, tuna Mizoram din­hmunah chuan state sorkar leh khua (village) inkarah mipui thlan (democratic body) engmah a awm lo nia sawiin, "Hei vang hian hmasawnna a kal chak lo a, a khai rual thei lo. State level aṭang ringawta development chungchanga ruahmanna siam a nih chuan district tin leh khaw tin a thleng thei lo," a ti a; hmasawnna khai rual chu Panchayati Raj-in a tum a nih thu a sawi.

Lalfakzuala hi India rama Panchayatiraj hmanna hmasa Bombay khawpuia CEO hmasa ber, kum hnih a lo thawk tawh a ni.

ZPM general secretary K Sapdanga chuan, sorkar hnathawkte'n 7th. Pay anga hlawh lak phûta chawlh an lâk chungchang sawiin, "He thil thleng hi tun hma aṭanga inrêlbâwl dan fuh loh vang a ni. Hetiang thil thleng hi ZPM chuan pawi a ti a, pumpelh theihah kan ngai. Harsatna thleng ngei tur, hmuh lawk ni si, hlamchhiah vanga inchhek khawl lo lan chhuahna chi khat niin a lang," a ti.

VUC chairman press conference hi MPC sr vice president Vanlalhlana leh ZNP vice president Dr Kenneth Chawnglianaten an ṭawiawm a ni.