Sorkar hnathawkte'n ni hnih hnuah A huhoa chawlh lak an titawp lailâwk

Federation of Mizoram Govern­ment Employees and Wor­kers (FMGEW) bultuma Mizoram sor­kar hnathawkte'n 7th. Pay zûlzuia hlawh lak phûta mass casual leave an lâk chu an chawlhsan rih dawn. FMGEW chuan sorkar hnathawkte chu vawiin aṭanga an hna zawm turin an ngen.

FMGEW Executive Committee chuan, 7th. Pay zûlzuia hlawh lâk phûtna atan hian December 6-8, 2017 chhung mass casual leave lak an rêl a, December 6-7 chhung mass casual leave an la hman a ni.

Sorkar thuneitute nen an inbiak hnuah nimin chawhnu khan FMGEW hruaitute an ṭhukhawm leh a, mass casual leave lak chu chhunzawm rih loh an rel a ni.

FMGEW chuan thuchhuah siamin, December 6, Nilaini zan khan Chief Minister mawhphurhna la mektu Home minister R Lalzirliana'n a sàwm angin, a inah an lên thu an tarlang a, "Inkawmhona hun ṭha tak neih a ni a, 7th. Pay chungchanga kan harsatnate pawh uluk taka sawiho a ni. 7th. Pay chungchanga kan harsatnate a theih anga ranga chinfel min tiam a ni," an ti.

Mass casual leave laa lungawi lohna an lantir chu chawlhsan turin Home Minister-in a ngen thu tarlangin FMGEW chuan, 'In duhnate chu sorkarin a hre tawh,' a lo tih thu an sawi a, "Committee chuan ngun takin a ngaihtuah a, tun dinhmunah chuan chawh lâk hi chawlhsan rih ni se, kan ti," an ti a; FMGEW headquarters thu leh hla ngaichâng zel turin member-te an ngen.

FMGEW chuan, Chief Minister leh Home Minister ten a rang lama 7th. Pay hman a nih theihna atana hmalak a nih tur thu an tiam nia sawiin, "Chutih ruala office zawm tura min ngennate a zahawm kan ti a. Hetiang a nih avang hian Mizoram sorkar hnuaia hna thawk zawng zawngte chu lungrual taka December 8 aṭanga hna chhunzawm leh turin kan inhriattirin kan inngen a ni," an ti.

FMGEW chuan, 7th. Pay anga hlawh lâk phûta ni hnih chhung a huhoa chawlh an la chu Mizoram puma an member-te inpekna leh thawhrimna rah a nih thu sawiin, "Duty tura ruat zawng zawngte tlâwm­ngai taka an duty-naah lawm­thu kan sawi a ni," an ti a; chawlh an lak lak chhunga anmahni thlawptute chungah lawmthu an sawi.

Lungawi lohna lantir chhunga pa chan changa hrethiam taka dawmtu sorkar hotute chungah lawmthu sawiin FMGEW chuan, rilru tihnat an nei a nih chuan hriatthiamna an ngen bawk.