PHE Minister-in hriatthiam a ngen

PHE minister Zodin­tluanga chuan, Laipui­tlanga PHE tuizem lian châwmtu tui pump khawl tinungtu ber, Chanmari-a booster transformer a chhiat vanga tui lama harsatna thleng mek chu hrethiam hram turin mipui a ngen a, "Khawl chhia hi chhun zan zawma siam mek a ni," a ti.

PHE Minister hian nimin khan Chanmari booster transformer chu a tlawh a, siam ṭhat hna thawh dan a enfiah. Booster transformer hi December 2, 2017 khan a chhia, siam ṭhat hna thawh mek a ni a, PHE department bakah P&E department hnathawkte'n an siam mek a, siamṭhat hun tur erawh hriat theih a la ni lo.

Booster transformer chhiat vang hian Aizawla veng 14 - Chanmari veng ṭhenkhat, Chanmari West, Hunthar Veng, Lai­pui­tlang, Chaltlang, Ram­hlun veng zawng zawng, Ramthar Veng, Edenthar Veng ṭhenkhat, MacDonald Hill, Bawngkawn veng ṭhenkhat, Electric Veng chung lam, Zarkawt, Dawrpui Vengthar chung lam, Aizawl Venglai leh Sihphir Vengtharahte tui sem theih a ni lo.