Kolkata New Town-a Mizoram House Sak nan revised estimate hmang zo lo

Kolkata-a Mizoram House pathumna, New Town-a mi, May 15, 2015-a hawn tawh sak nan Rs. 11,29,00,000 (original estimate) a ni a, revised estimate cheng nuai 2,114.30 siam ni mah se, revised estimate hman zawh a ni lo. Hetih lai hian, Mizoram sorkarin in satu contractor-te Rs. 43,52,202 a la batsak thung.

Thu dawn danin, Kolkata New Town-a Mizoram House sak nan hian revised estimate siam a nih hnua sum ruahman zat chu nuai 2114.40 ni mah se, hman zawh a ni lo a, Rs. 14,65,04,202 sengin sak zawh a ni. PWD hotute chuan, revised estimate zat ang chu sorkar aṭanga pek vek a nih ngai loh thu leh, New Town-a Mizoram House sakna revised estimate pawh hmang zo loin sak zawh theih a nih thu an sawi.

November 14, 2014-a Mizoram Legislative Assembly session- MNF member Lalruatkima zawhna PWD changtu leh chief minister Lal Thanhawla'n a chhannaah chuan, Kolkata New Town-a Mizoram House sakna tur original estimate amount chu Rs. 11,29,00,000 a nih thu leh revised estimate chu Rs. 21,14,30,000 a nih thuin a lo chhang tawh a; hna ṭan hun chu July 1, 2011 niin, March 1, 2013-ah sak zawh a ni.

Estimate siam dan chu - external electrification atan Rs. 2,14,51,770, SITC fire fighting system atan Rs. 1,47,22,330, SITC air conditioner atan Rs. 1,60,00,000, elevator atan Rs. 49,98,000, EPABX system atan Rs. 6,52,751 leh CCTV surveilance atan Rs. 29,74,334 a ni. Hna thawktu contractor chu Gagan Construction Pvt.Ltd., 156/A, Lenin Sarani, Kolkata a ni.

May 15, 2015-a hawn a nih ṭuma PWD technical report-a completion cost tarlanah revised estimate Rs. 21,14,30,000 tia ziah a ni a; PWD hotute chuan, technical report-a completion cost Rs. 21,14,30,000 tia ziah chu fimkhur tâwk loh vanga an ziah sual palh a nih thu an sawi a, Sum hi revise a nih hnuah a taka an sum hmuh LOC REC, Actual Fund Utilised/Received chu Rs. 14,65,04,202 a ni," an ti.

Mizoram House sakna atana Rs. 14,65,04,202 hman aṭangin Mizoram sorkar chuan contractor hnenah Rs. 43,52,202 a la batsak mek a; thu buatsaih lai thleng hian contractor hnenah Rs. 14,21,52,000 a pe tawh tihna a ni. PWD-in sum an dawn dan (LOC) leh contractor hnena an pek tawh dan chu - March 29, 2011-ah nuai 50, February 3, 2012-ah nuai 193, March 5, 2013-ah nuai 516, March 27, 2014-ah nuai 318 leh March 30, 2015-ah nuai 344.52 a ni.

Kolkata New Town-a Mizoram House sakna ramah hian Mizoram sorkarin West Bengal sorkar aṭangin October 2, 2008-ah ram neitu nihna a nei ṭan a; July 22, 2011-ah New Kolkata Development Authority (NKDA) aṭangin in sak phalna a nei a, NKDA aṭang hian March 7, 2015-ah residential certificate hmuh a ni bawk.