Champhaiah MNF policy SEDP zirho

MNF Champhai South Block chuan nimin khan Champhai Venglai community hall-ah MNF policy - Socio Eco­nomic Development Policy (SEDP) zir­hona an buatsaih a; MNF general head­quarters-a vice president Dr R Lal­thang­liana'n hmanpuiin, SEDP a sawifiah.

Dr R Lalthangliana chuan, MNF an sorkar laiin ṭhalaite tan hna tam tak an siamsak nia sawiin, "Police battalion pali kan din a, vawiina kan sorkar chuan pakhat pawh a din lo a, chutih ahnêkin sorkar hnathawkte hlawh a pe hleithei lo zawk a ni," a ti.

Congress sorkar laia Champhai district puan chu MNF sorkarin a nihna ang takin an kalpui tih sawiin R Lalthang­liana chuan, "Thil pawimawh tam tak kan dah a, sorkar office pawimawh zawng zawng kan dah a ni," a ti a; Champhaiah CHANEM an sak thu leh Champhai inkalpawhna zawng zawng an laih thu te, Champhai Greater Water Supply Scheme an siam thu te, Indo-Myanmar Border Trade Centre an din thute a sawi.

Dr R Lalthangliana chuan, hmasawnna atan inkalpawhna pawimawhzia an hria tih sawiin, "Tuna thingtlang inkalpawhna tam tak, Congress sorkarin a enkawl zui loh vanga ṭhing ṭhuapte hi MNF sorkar laia kan siam a ni. MNF kan sorkar leh hunah chuan, Mizoram inkalpawhna awlsam zawk leh ṭha zawk siam kan tum a, zin kawnga hun hman a tlem zawk theih nan kawng hnai zawk tam tak siam kan tum bawk," a ti.

MNF Vice President chuan, SEDP hmangin thuneihna sem zâi an tum thu sawiin, thingtlang kilkhawr thlengin thuneihna sang zawk leh roreltir theih SEDP-in a tum a, MNF kan sorkar chuan Assembly ṭhutkhawm hmasa berah kan pass dawn a ni," a ti. MNF an sorkar chuan, hmun hrang hranga Mizo awmte inpumkhatna ṭha zawk a awm theih nan International Zofa Convention te, Cultural Meet-te SEDP hnuaiah buatsaih an tum thu a sawi bawk.