Thingdawl Polytechnic building luah a la ni lo

Cheng nuai 800 sênga kum thum liam taa sak zawh tawh, Thingdawla Polytechnic building-te chu nimin thleng khan luah a la ni lo.

Polytechnic dinna atan hian cheng nuai 1,230 ruahman niin, building sak nan bik cheng nuai 800 sên a ni a; a bâk zawng chu bungrua hrang hrang mamawh ‘Necessary and required equipment’ lei nan ruahman a ni.

Building sak tura ruahman pali - administrative block, electrical trade building block, automobile trade building block leh multipurposehall-cum-library building-te chu sak zawh vek a ni tawh a; equipment erawh a sum a thlen loh avangin lei a la ni lo. Building sak hna hi 2011-ah ṭan a ni a, nikum September khan sak zawh fel a ni.

Thu dawn danin, building sak zawh tawh, la luah lohte chu a la ṭha viau a, amaherawhchu, rawng hnawih thar a ngaih bakah, darthlalang ṭhenkhat a keh a, bang ṭhenkhat pawh milem ṭawp leh thuziak ṭawp tak tak hmanga ziah ràn a ni.