June 2017 hnuah teak tum 1,721 man tawh
June 2017 aṭanga December thla tîr thleng khan Mizoram khawthlang lama ramri vengtu 159 Border Security Force (BSF)-te chuan ram páwna dan loa hralh tur nia hriat teak tum 1,721 an man tawh.
Tlabung aṭanga thu dawn danin, Mizoram chhunga thing leh mau hmanga dân loa sumdawnna tihtàwp tumin BSF-te'n ṭan an la a; kumin June thla hnua dân loa ram páwna hralh tur ni ngeia hriat teak an man zat chu tum 1,721 a tlin tawh bakah, a kaihnawihah meilawng pakua an man tawh a ni.
159 BSF hotute chuan, teak an mante chu a neitua inchhál an awm loh ṭhin thu leh, an teak man ṭhenkhat chu a neitu nia rinhlelhte an tlanchhiat hman ṭhin thu an sawi a; teak leh a hnûktu meilawng an mante chu a mawhphurtu department-te hnenah an hlan chhâwn ṭhin thu an sawi bawk.
159 BSF chhinchhiah danin, dân loa hralh tur nia hriat teak an man zawng zawng hlut zawng chu Rs. 1,027,075 a ni a; teak hnuhna atana hman meilawng an man hlut zawng chu Rs. 9,00,000 vel a ni.
Tlabung leh a chhehvela ram pahnih - India leh Bangladesh inrina hrúlah hian BSF battalion pahnnih - 01 battalion leh 159 battalion-te an duty mek a; BSF battalion pahnihte hian Nunsury leh Silkur-a an checkpost-ah ramri kana dân loa thawn chhuah tur Mizoram thilte an dap ṭhin a ni.