KHAWTHLIR

Press Club
MJA office bearer-te nimina Aizawl Press Club-ah ṭhukhawm chuan, Aizawl Press Club hawn hun chhung tur an bituk a, December 23, 2017 thleng hawn a ni ang. Aizawl Press Club hi December 24-26 chhung khâr a ni dawn a, December 27-30 chhung hawn a ni ang a, December 31 aṭanga January 2, 2018 thleng khar a ni leh ang a, January 3-ah hawn ṭan leh a ni ang.

LP gas man
Tun hnaia Kolasib khawpui chhunga eirawngbawlna gas sem zinga bûr 40 velah tui a awm tih hmuh chhuah a ni a, Kolasib DC thupek angin gas phurtu driver man niin, gas bûr 40 man chawitir a ni. Gas-a tui awm la fuh inhriattir mi 40-te chu gas bûr dang pek leh vek tura tih a ni.

Chawimawina hlan
January 28, 2016-a Chawngte-a Supply storekeeper Vanlal-tlana that a, cheng nuai 17.8 rûksaka tlanbo zui Lalnunzauva (24) s/o Lalmuana (L), Chawngte, Riasikah khaw dáia lo man a, rang taka police hnena thu thlentu Biaksanglura chu nimin khan IGP Zorammawia pisaah Mizoram police-te'n chawimawina an hlan. Chawimawina atan hian thuchei leh Rs. 5,000 an pe a ni.

NEDP-ah inelna
NEDP-EDS hnuaia inelna tur, 2nd. Micro Start-up Competition chu nizan khan hawn (kick-off) a ni. He inelnaah hian Mizorama cheng Mizo tu pawh tel theih a ni a, intihsiaknaa ti ṭhate tan Rs. 5,00,000 thleng start-up capital hmuh theihna a ni.

Silai lem man
Mizoram Police-te chuan nimin khan Aizawl DC thupek bawhzuiin New Market, Aizawlah silai lem a mu kap chhuak thei 150 an man. Aizawl DC thupek bawhzui hian police-te'n silai lem engemawzat an man tawh.