Critics' Choice Award-ah 'The Shape of Water' langsar

Kum tina sem ṭhin Critics' Choice Award chu nakkum January 11 khian sem a ni leh dawn a, 'The Shape of Water' chu a langsar rih hle.

Broadcast Film Critics Association leh Broadcast Television Journalists Association ṭangkawp chuan Critics' Choice Award hi an sem ṭhin a, January thlaah sem ṭhin a ni. 'The Shape of Water' chu award dawng thei tura langsar ber a ni mek a, category hrang 14 zetah chhawpchhuah a ni. Chung zingah chuan Best Picture, Best Director, Best Original Screenplay, Best Cinematography, Best Costume Design leh Best Visual Effect pawh a tel. Hengte hi award ngaihlut hlawh tak tak vek a ni.

Hei mai hi a la ni lo a, he film-a a changtu nu ber Sally Hawkins chu Best Actress award dawng thei tur zingah a tel a, a dinhmun a ṭha viau. Sally hi Los Angeles Film Critics Association chuan Best Actress prize an lo hlan tawh bawk a ni. 'The Shape of Water' hi December 1 khan tlangzarh a ni chauh a, he film siam nan hian $mtd 19.5 an seng. Tlangzarhna la rei lo viau mah se award a dawng der tawh a, tun hnai khan Golden Lion award a la a ni.

Best Actor atana thlan theih zingah 'Call Me by Your Name' star Timothee Chalamet chu a langsar a, a ni bakah hian James Franco leh The Post star Tom Hanks te pawh chhawpchhuah an ni. Best Supporting Actor dawng thei tura chhawpchhuah zingah 'The Shape of Water' star Richard Jenkins chu a khan viau bawk.

Critics' Choice Award-ah hian kumina film chhuak tawh zinga a langsar chu an telkim viau a, Blade Runner 2049, Beauty and the Beast, Baby Driver, Wonder, Darkest Hour, War for the Planet of the Apes, Thor: Ragnarok, Wonder Woman leh Coco te chu award dawng thei tur zinga an tel a ni.