Lirtheia chetsualnaah mi pathum an thi

February 7, Zirtawpni zan leh February 8, Inrinni chhun khan Aizawl leh Champhaia lirtheia chetsualnaah mi pathum an thi. Champhaia mi su hlumtu maxi­cab chu mipui thinrimin an hâl.

Inrinni chhûn dar 12 vel khan Hmangaihsanga (35), Bulfek­zawl khuaa mi khalh maxicab chuan Champhai Zotlangah C Khawllianthanga (55), Mualkawi khua chu a sú a, ká pawh chhawn lohin a thi. C Khawllianthanga a sutna bul dâwra awm T Laikunga leh a nupui Lalvangi pawh maxicab hian a sú a, damdawi-inah dah an ni ve ve a; Lalvangi chu Champhai damdawi-inah dah niin, T Laikunga chu Aizawl panpui a ni.

Maxicab hian C Khawllian­thanga te a sut hmain Champhai leh New Champhai inkar kawng siam hna thawk mek Tarmat company-a thawk hnam dang pahnih a sú a, mahse, a tlan tlang lui a ni. Hnam dang pahnihte chu damdawi-inah dah an ni a, pakhat zawk chu a dinhmun a ṭha vak lo tih, thu dawnna chuan a sawi.

Maxicab hi a khalhtu Hma­ngaihsanga ta a ni a, Champhai police-te'n an man. Chumi  hnuah mipui thinrim pungkhawmin, maxicab chu an nawr sawn a, mi a sutna aṭanga metre 150 vela hlá Champhai leilet zâwlah an hâl a ni.

Mualkawi ṭhalai thinrimte chu pawikhawihtu hmuh tumin Champhai Police Station tualah an pungkhawm a, khawtlang hruaitu leh police hotute inkâwm­in, thil duhawm lo a thleng zui lo.

February 7, 2020 zan dar 9 vel khan Tuikual venga lung tohlâwt bulah truck-in a hmaa tlân bike a sú a, truck leh bike khalhtute a hmunah an thi ve ve.

Thu dawn danin, Vaivakawn lam pana tlân bike pakhat chu a hnunga tlân truck pakhatin truck dang nen a sut chilh a, bike khalhtu Zorinpuia (23), Ngen­tiang khua, Salem Veng, Aizawla cheng mek leh, truck khalhtu Zomuana (38), Hunthar Vengte chu chetsualna hmunah hian an thi a ni.