Union Home Minister leh CM-te'n Ramri chungchang an sawiho

Kolkata-a Nabanna Sabhaghar Secretariat-ah December 7, 2017 khan India rama Bangladesh rîtu state chief minister-te leh Union Home minister pahnihte an inkâwm a; kum 2014 leh September 2017 inkarah Mizoram ramri hrûlah dan bawhchhiatna a awm lo niin an tarlang.

Inkawmhona hi Union Home minister Rajnath Singh-a'n a kaihruai a; Union minister of state for Home Kiren Rijiju, chief minister Lal Thanhawla, West Bengal CM Mamata Banerjee leh Assam CM Sarbananda Sonowal te an tel. Ramri venhimna kalpui dan tur te, India rama raltlan lutte chungchang, ramri hung leh thil pawimawh dangte an sawiho a ni.

Mizoram CM Lal Thanhawla chuan, ramri hung vanga ramri hrûla chengte eizawnna tihchhiat a nih thu sawiin, chu'ng lo neitute chuan thlawhhma an neih leh theihna turin Mizoram chuan ramri hung ṭhat a phût thu a sawi a; "Border fencing awmna hi Mizoram tana ram tihêk lo thei ang berin zero line (ramri)-ah sawn zawk se kan duh a ni," a ti.

Lal Thanhawla chuan, Myanmar tualchhung buaina vangin Mizoram chhim lam, Lawngtlai district-ah Zo hnahthlak mi eng emaw zat an rawn raltlan tih sawiin, chumi chungchangah chuan sorkar laipui leh Mizoram sorkar thawhho ṭhat a ṭulna hrang hrangte a sawi a; Rohingya raltlante vangin Mizoramin harsatna la tâwk lo rih mah se, Mizoram chu a inrinlâwk a ngaih thu leh, sorkar laipui pawhin Mizoram ramri venna a thuam ṭhat a ngaih thu a sawi bawk.

Meeting-a report an pek danin, kum 2014 leh September 2017 inkarah Mizoram ramri hrûlah dan bawhchhiatna a awm lo niin Border Security Force (BSF)-in an tarlang.

West Bengal, Assam, Meghalaya leh Tripura state chhungahte erawh chuan BSF-in lungawi lohna thuziak thehluh 16,550 an dawng a, chu'ng zinga 6,229 chu thutlinga pawm niin, FIR nen bawhzui a ni. FIR ziah luh hnuah thubuai 658 kaihnawihah a mawhphurhtute hrem an ni.

Meeting-ah hian, ramri venhimna tichak turin Border Protection Grid (BPG) din a nih tur thu sawi a ni a; Border Area Crime Control and Security hna thawk turin state tinah DGP kaihhruaiin state police hnuaiah Task Force din turin ruahman a ni.

Ministry of Home Affairs (MHA) chhinchhiah danin, ramri hrul state pangaah ramri hungna páwnah khua 148 a awm a, chu'ng khaw hrang hrangah chuan mi 53,444 an cheng. Mizoram bikah chuan ramri hungna páwnah khaw 21 awmin, chu'ng khaw 21-ah chuan mi 3,128 an cheng mek.

MHA-in state pangate tana Border Area Development Programme (BADP) hnuaia sum ruahman zat chu - kum 2017-18 chhungin Assam tan cheng vbc. 56, Meghalaya tan vbc. 25, Mizoram tan vbc. 46, Tripura tan vbc. 71 leh West Bengal tan vbc. 122 a ni a; Mizoramin a chan tur vbc. 46 aṭangin vbc. 40.07 a dawng tawh.

Meeting-ah hian Mizoram aṭangin MLA pahnih - PC Zoram Sangliana leh Nihar Kanti Chakma te leh Home department-a OSD David H Lalthang­liana te pawh an tel a ni.

Nihar Kanti Chakma chuan, Mizo­ram chhungah ramri hung a nih dawnin ramri hrûla chengte râwn a ni lo a, an khawsak phung zir chiang hmasa loin thil kalpui a nih thu te, contractor-te'n an remchan dan angin hna an thawk a, chu chuan tam tak ramri hungna páwnah a dah thu leh, an huan leh lo neihna te pawh tlawhpawh hleih theih loha a siamsak thu a sawi.