December 11 atangin No Tolerance Drive Garage nei lo lirthei 143 man a ni tawh

Traffic police leh Transport department enforcement-te chuan December 11, Thawhṭanni aṭangin inngaihhnathiamna tel loa lirthei endikna, No Tolerance Drive an kalpui dawn. Hetih lai hian, garage nei lo lirthei 143 man a ni tawh.

Sorkar thuchhuah chuan, kum 2017 Krismas leh 2018 kum thar lo thleng tur mi tinin dam leh hlim taka an hman theih nan Aizawl khawpui hmun hrang hrangah No Tolerance Drive/Checking kalpui a nih dawn thu a tarlang a, "Traffic dan bawhchhia, a bikin zu rui chunga lirthei khalh, mei zu chung leh mobile phone hmang chunga lirthei khalh, phur rit lutuk (over loading), lirthei chak lutuka khalh leh document fel leh fel lohte 11.12.2017 aṭangin kalpui a ni dawn," a ti.

Sorkar thuchhuah tarlan danin, No Tolerance Drive chhung hian zu rui chunga lirthei khalh mante chu an driving license suspend/cancel turin DTO hnenah thawn zel a ni dawn a; garage certificate check tel nghal a ni ang a, garage certificate nei lo mante chu MV Act hmanga hrem an ni ang.

Aizawl khawpuia lirthei zawng zawngte garage nei vek tura tihna thupek, december 1, 2017-a kalpui chu Coordination Committee on Traffic Management hnuaia Working Group Committee-te'n an bawhzui zel a, garage nei lo lirthei man pawh an belh belh zel.

Vanglaini palai zawhna chhangin Traffic SP C Lalthanmawia chuan, garage nei leh nei lote zan lamah an enfiah zel a, mahse, an enfiahna tur vengte erawh chu an sawi lâwk lo tih a sawi a; "Kan enfiahna vengah man tur eng emaw zat a a la awm zel a ni," a ti.

Traffic Police hotute sawi danin, sorkar­in lirthei nei zawng zawngte a dahna garage nei vek tura a hriattirna thupek hi bawhzuiin, veng hrang hrangah zan hnih enfiah a ni tawh a; chutah chuan vantlang kawngpui sira lirthei riah/dah 143 man a ni tawh. Veng dangah pawh enfiah chhunzawm zel a ni ang.