Christmas Blood Donation huaihawt a ni

Association for Voluntary Blood Donation (AVBD) chuan thu­chhuah siamin, December 2017 chhungin Aizawl Civil Hospital leh Synod Hospital blood bank-ahte 'Christmas Blood Donation' neih ṭan a nih thu an tarlang a; Krismas thilpek atan thisen pe turin Mizo ṭhalaite an sáwm.

Nimina AVBD thu­chhuah chuan, kum 2017 chhungin Mizoram district pariata blood bank 10-ah mi ṭhahnem takin thisen an pe a, pawl tam takin blood donation camp an huaihawt tih sawiin, "Mi dangte tana malsawmna ni tur leh damlote nunna chhanna atana thisen petute zawng zawng chungah lawmthu kan sawi a ni," an ti a; thi­sen pekte chu damlote'n dam phah nan an hmang tih sawiin, "Thisen petute hi damlote nunna chhanhimtu an ni," an ti.

Krismas leh kumthar vuakvêtah thisen mamawhna a sang ṭhin a, chutih laiin, thisen pek a tlakhniam hun lai a nih avangin, thisen pek a tam zawk theih nan Christmas Blood Donation huaihawt a ni tih sawiin AVBD chuan, December thla chhungin Krismas thilpek atana thisen pek uar tur leh thisen pek tum ṭheuh turin Mizo ṭhalaite an sáwm a ni.

AVBD chuan, Aizawl Civil Hospital leh Synod Hospital-te nen ṭang ruala Christmas Blood Donation an huaihawtah thisen petute chu ei leh in tur tuihnai tak hlui zel an nih tur thu an sawi bawk.