Kolasib-ah World Disabled Day hmang

RMSA, SSA leh Social Welfare department ṭang­kawp chuan nimin khan Integrated School, Kolasib-ah World Disabled Day cum Special Olympic an hmang a, Kolasib DC R Zarzosanga’n a hmanpui.

Kolasib DC chuan, rual­banlote mi ropui tak takah an chhuak fo tawh tih sawiin, "Ziaktu ropui, political activist, zirtirtu ṭha leh mi dangte tana mi inpe zo tak Hellen Keller (bengngawng leh mitdel), thawnthu ropui tak tak ziak­tu Homer (mitdel) leh ke bulh vanga hnual duh lo ke lem (blade) hmanga tlan chak hmingthang Oscar Pistorius-te an awm a ni," a ti.

Rualbanlote chu mi dang an phâk lohna leh mi dang aia an vanduaina chu hnual phah nan hmang lo a, tumruhna neih phah nan hmang tura fuihin R Zarzosanga chuan, an dinhmun chu Pathianin a theihnghilh ngai loh avangin beidawng loa hma lam pan zel turin a chah.

Special Olympic-ah hian rualbanlote tan zai leh intihhlimna chi hrang hrang buatsaih a ni.