Halpuah hâlna in neitu thubuai siamsak dawn

Home minister R Lalzirliana chuan, Federation of Mizoram Government Employees and Worker (FMGEW)-in December 6-7, 2017 chhung mass casual leave an lak hnua an titawp chu sorkarin lawmawm a tih thu a sawi a; Krismas leh kumthar vuakvetah hâlpuah leh hâlmawi hâl an awm chuan, a hâlna in neitute thubuai siamsak an nih tur thu a sawi bawk.

Nimina Congress Bhavan-a inkhawmah thu sawiin R Lal­zirliana chuan, "FMGEW-in 7th. Pay hlawh kar nana mass casual leave an lakah, sorkarin nuar tawh lo tura an ngenna pawma an nawrh an titawp hi sorkar chuan a lawmawm a ti tak meuh a ni," a ti.

Home Minister chuan, Mizo mipuite chu hunpui hmang mai tur an ni tih sawiin, "He hunpui kan hman turah hian Zoram mipuite'n hlim leh lawm taka kan hman theihna turin hâlpuah leh puak thei dang leh silai lem, a mu kap chhuak theite khap leh a ni," a ti a; kum kal taah mahni in kalh khum a, in chung záwla hâlpuah leh hâlmawi hâl an awm ṭhin tih sawiin, chutiang ti chu an awm leh a nih chuan a in neitute thubuai siamsak an nih tur thu a sawi.

Traffic chungchang sawiin R Lalzirliana chuan, mi ṭhen­khatin social media-ah thu déngkháwng tak taka sorkar bei an awm tih a sawi a, "Motor garage neih tur kan tih chungchangah veng dang aṭanga lengte leh mikhual motor chungchang­ah hriatthiamna kan nei. Heng kan hmalaknate hi mikhual tan leh keimahni ṭhatna tur zawk a ni," a ti.