H/S leh HSS zirlai mi 4,513 zinga 68-in heroin an ti ṭhin tih hmuh a ni

Naupang leh tleirawl kum 10-17 inkara ruihhlo hmansual chungchang zirchianna, Survey Report on Drugs and Children in Mizoram 2022 tih chu nimin khan Social Welfare minister Dr K Beichhua'n Secretariat conference hall-ah a tlangzarh. Zir­chiannaah hian high school leh higher secondary school zirlai 4,513 zinga 68-in heroin (no.4) an ti ṭhin tih hmuh chhuah a ni.

Zirchianna hi Social Welfare & Tribal Affairs department hnuaia Mizoram Social Defence & Rehabilitation Board buatsaih a ni a; district pariata M/S 77, H/S 33 leh HSS 12, a vaiin sikul 112-a zirlai 10,746-te dinhmun zir chian a ni. Zirchiannain a tum ber chu tleirawl kum 18 hnuai lamte ruihhlo leh a kaihhnawiha an dinhmun leh an derthàwnna hriat chian a ni.

Zirchiannaa thu zawhfiah zirlai 10,746 zinga 6,233 chu M/S naupang an ni a; an zinga mi 2,543 (40%) chuan vaihhlo (tobacco) an ti ṭhin. H/S zirlai 2,083 thu zawhfiah zinga 33 leh HSS naupang 2,430 thu zawhfiah zinga 35 chuan heroin no.4 an ti ṭhin a ni.

Social Welfare Minister chuan, ram leh hnam chhan nan ruihhlo do a ṭul thu a sawi a, "Naupangte zingah zûk leh hmuam, ruih theih thil ti an tam ta lutuk hi a pawi hle. Vawi khat tih chhin hi a pawi a, nghawng ṭha lo nasa tak a nei thei a, naupang tê an nih lai aṭangin zirtir an pawimawh tak zet," a ti.

Zu, ruihhlo leh a kaihhnawih donaah mipui, khawtlang leh tlawmngai pawlte ṭan rual a pawimawh thu sawiin Dr K Beichhua chuan, "Ruih theih thil leh rilru lam kaihhnawih harsatna a kal kawp tlat a, naupang leh ṭhalaiah rilru buaina, beidawnna, ṭha tâwk loa inhriatna, intihhlum duhna hial a thlen nasa em em a ni," a ti a; Survey Report chuan rah ṭha tak a chhuah ngei a beisei thu a sawi.

Survey Report on Drugs and Children in Mizoram 2022 tlangzarhnaah hian sorkar department hrang hrang aiawh te, YMA, MHIP leh kohhran hruaitute an tel a; survey report chungchanga hmalak zel dan tur an sawiho nghal a ni.

Ruihhlo laka naupangte venhimna turah zirna-inte kaltlanga hmalak a hun tawhzia te, sorkar department hrang hrang leh pawl hrang hrangte lungrual taka theihtawpa an ṭanho a ṭul thute an sawi.

SURVEY REPORT TLANGPUI
1) Naupang sikul kal lai leh kal tawh lo (school dropout)-te'n ruihhlo an hmel­hriat tawh hle.
2) Naupang ruihhlo tih ṭan kum chu a kum telin a hniam zel.
3) Naupang sikul kal chhunzawm lo ṭhen­khat chu ruihhlo an khawih vang a ni.
4) Zirlai naupang ruihhlo ti ṭhinte chu ruihhlo chak zawkah lut chhoin, an tih tam mai bakah, an ti zing tial tial.
5) Naupang ruihhlo ti ṭhin zingah rilru lam kaihhnawih harsatna a tam phaha hriat a ni.
6) Khawvel huapin ruihhlo hmansual leh rilru lam kaihhnawih harsatnain inkungkaihna a neia hriat a ni.