Liansanga kum 2 táng tura hrem a ni Bail a dilna vawiinah ngaihtuah a ni dawn

Aizawl District Court-a Special Judge (Prevention of Corruption Act) Dr HTC Lalrinchhana chuan eirûk thubuaia December 7, 2022-a thiam loh a chhantir tawh, PWD engineer-in-chief hlui Liansanga (72), Khatla hremna tur nimin khan a puang a, kum hnih chhung jail-a táng tur leh Rs 15,00,000 chawi turin a ti. Liansanga hian bail a dil a, vawiinah ngaihtuah a ni ang.

Special Court chuan Liansanga hi Kau Tlabung leh Tuipanglui Mini Hydel Project-a eirûk leh thuneihna hmangsuala puh a nihnaah IPC Section 409 leh 477A te, PC Act 1988 Section 13(2) [Section 13(1)(c)&(d)] hmangtein thiam loh a chantir a; thubuai pathumah hian kum hnih táng tur leh Rs 5,00,000 ṭheuh chawi turin a hrem a ni.

Hetih lai hian, Special Court chuan Liansanga chu thubuai pathumah thiam loh chantir ni mah se, jail-a a tàn hun tur chu belhkhawm loin, hun thuhmun (kum hnih)-ah tlak turin a ti a; hetianga tih a nih chhan chu - sorkar hnathawk pension tawh, kum 72 tling tawh a nih avangin a thil tihsual ang tihsual lehna chance a nei tawh loa a hriat avang te, Court-in vawi khat thiam loh a chantirna a nih avangte leh, a hriselna dinhmun (zunthlum, hyper­tension, adt.) a neih vangte a ni.

Liansanga hian thubuai pathuma hremna chu kum hnihah tlâk dawn mah se, pawisa a chawi tur erawh chu belh khawm tur a ni a, thubuai pathumah Rs 5,00,000 zel chawi tura tih a nih avangin a sum chawi tur zat chu Rs 15,00,000 a ni.

Court-in hremna tur a puan lai hian Liansanga hi Court-ah a inlan a, puan a nih zawhah Aizawl District & Sessions Court-a lock up-ah dah a ni a, tlaiah Central Jail-ah dah luh a ni.

Hetih lai hian, a hriselna dinhmun avangin jail táng dangte chuanna lirtheiah chuang lo a, mimal lirtheia chuan an dilsakna chu Court-in a remti a, Liansanga chu lirthei hranpa hmangin venhimna hnuaiah jail panpui a ni. Thiam loh chantir a nih ní, December 7, 2022 pawh khan lirthei dang hmangin, táng dang rual tho siin jail panpui a lo ni tawh bawk.