Mi pahnih thattua puh Police-in an la man lo

December 7, Nilaini zing khan Mamit Luangpawl Venga chêng Rokimi (51) leh a tupa Mark Lalawmpuia (7) te chu an chenna inah thia hmuh an ni a, tualthattu nia rinhlelh Rokimi pasal Liantea, Myanmar lam mi chu man a la ni lo.

Rokimi leh a tupa hi hreipui hmanga cheh hlum an nia hriat a ni. Rokimi chu khum bulah bawkkhupin a awm a, a lu-ah hreipuia chehna hnûhmá eng emaw zat hmuh a ni. Mark Lalawmpuia chu khumah bawkkhupa hmuh a ni a, a lu-ah hreipuia chehna hnûhma hmuh a ni bawk.

Thu dawn danin, Rokimi te chenna hi mi in hnuaiah a ni a, ruang an hmuh tirh hian kawngka chu páwn lam aṭanga hawlh kalh a ni. Anmahni thattua rinhlelh Rokimi pasal Liantea chu a tlanbo a, he thu ziah lai thleng hian man a la ni lo. Mark Lalawmpuia hi Rokimi fa bik fa a ni.