Ram dang kuhva India rama a luh chhan AR leh Customs inthlahdah vang - MP Vena

Rajya Sabha MP K Vanlalvena chuan nimin khan Parliament thlasik ṭhutkhawma zero hour-ah thu sawiin, Mizoram leh Tripura-a kuhva chíngtute'n harsatna an tawh chungchang a au chhuahpui. MP chuan, ram dang kuhva India rama a luh theih chhan chu Assam Rifles leh Customs inthlahdah vang a nih thu a tarlang.

Kuhva rah chungchang hi MP K Vanlalvena chuan Facebook-ah tarlangin, "Foreign kuhva Myanmar aṭanga India rama a lo luh theih chhan hi central agency pahnih - Assam Rifles leh Central Customs-te inthlahdah vang liau liau a ni, chhan dang mawhpuh tur a awm lo. Heng agency-te hi a mawhphurtu awm chhun an ni," a ti.

Parliament-a thu a sawiah K Vanlalvena chuan, Mizoram leh Tripura-a tlang mi tam takin kuhva chin chu hun rei tak eizawnna pui berah an hman tawh thu sawiin, state pahniha kuhva chíngtute'n kumina kuhva an tharte India ram state dangah an hralh theih loh thu Parliament House hrilh.

K Vanlalvena chuan, Mizoram leh Tripura loneitute thar kuhvate chu sorkar laipuia Ministry of Home Affairs thupek an hmuh avangin Assam sorkar mi leh sate'n Assam state chhungah an lo man ṭhin tih a sawi a; official ṭhenkhat report-a a lanin, Asia chhimchhak ram aṭanga kuhva ro tam tham tak Myanmar kaltlangin India ramah a luh thu leh, chu'ngte chu sorkar laipuiin dan chaha tihtawp a tum nia hriat a nih thu a sawi bawk.

Ram dang aṭanga kuhva rawn lut tihtawp chu ṭha a tih thu a sawi rualin Mizoram MP chuan, "Hmarchhak mite kuhva thar erawh chu India ram khawi hmunah pawh zalên taka hralh phalsak tur a ni. Ram dang kuhva leh India ram kuhvate hi hriat pawlh loh tur a ni. Hmarchhak bial hi ram dangah kan ngai a nih si loh chuan hmarchhak biala kuhva tharte hi zalen taka hralh chhuah a ni tur a ni," a ti.

MP K Vanlalvena hi tun hnaiah a kheimit zai a nih avangin Parliament session-ah hian wheel-chair-a ṭhu chungin a tel a ni.