Sialsuk damdawi-in sak thar hawng

Health & Family Welfare minister Dr R Lalthangliana chuan nimin khan Sialsuk Primary Health Centre sak thar a hawng. Minister chuan, health sub-centre nei lo khuate harsatna phuhru turin khaw 230-ah health clinic din a nih tawh thu a sawi.

Dr R Lalthangliana chuan, Sialsuk khuain kum 1922 velah damdawi-in an nei tawh a, Mizorama damdawi-in nei hmasa pawl an nih thu sawiin, "Bialtu MLA, khawtlang leh NGO hruaitute hmalakna zarah NABARD hmanga PHC sak tur zingah pawh ngaih pawimawh hmasakah Sialsuk PHC dah a ni a, PHC thar sak zingah a ṭha ber pawl a ni," a ti.

HFW Minister chuan, "Harsatna hrang hrang avangin duhthusama hmalak theih ni lo mah se, health sub-centre 300 chuang chu health & wellness centre-ah hlan kai a ni tawh a, la hlàn kai lohte pawh sorkar kum tàwp hmain hlàn kai vek tum a ni," a ti a; damdawi-in hrang hranga thawktu indaih lohna chinfel thuai a beisei thu a sawi.

Sialsuk PHC hi NABARD RIDF-XXV sum Rs 2,28,68,000 hmangin CB Engineering, Venghlui, Aizawlin an sa a; casualty, x-ray room, pharmacy, consultation room, operation room, laboratory, store room leh inthiarnate siam a ni.