Mualvum khelmuala phûl lem phah hawng

Khawzawl Mualvum khelmuala phûl lem phah leh pavilion sak thar chu nimin khan deputy chief minister Tawnluia'n a hawng.

Phûl lem hi Mizoram sorkar sum cheng nuai 700 sénga phah a ni a, pavilion chu cheng nuai 400 sénga sak a ni. Deputy CM chuan, khelmual enkawl zuitu tur Khawzawl Bawrhsap kaihhruai Post Construction Management Committee kutah a hlan a ni.

Tawnluia chuan, Khawzawl district mipui inpekna leh inlungrualna avangin Khawzawl district a piang tih sawiin, "Chumi zarah chuan Mulvawm khelmual changtlung leh pavillion ṭha tak hi a lo awm thei a ni," a ti.

UDPA department-in khawpui changkanna leh hmasawnna te, hma lam pana ke pên zelna tura ṭangkaite a buaipui ṭhin tih sawiin Tawnluia chuan, "Chu'ng zingah chuan khawpuia infiamna hmunhmáte tihchangtlun ṭhin a ni. Games & sport hi khawpui cheina leh khawpuia chengte nun chawikanna a nih tel avangin hmalak a ni a, kan ṭhatpui ngei kan beisei," a ti a; UDPA-in khelmual a siam tawh chinah Mualvawm khelmual chu FIFA-in a pawmpui anga zau awm chhun a nih thu a sawi.

Deputy CM chuan, sorkarin infiamna tihhmasawn nan theihtawp a chhuah mek thu te, Khawhai leh a chhehvel khuate hman theih tur phûl lem phah theihna khelmual lian tham siam tura hmalak mek a nih thu te, NHIDCL phungbawmah sáwmin tunah hian Khawhai khelmual laih bul ṭan a nih thu te, rei lo têah laih zauh hna zawh a nih tur thu te, phûl lem phah turin theihtawp chhuah a nih thute a sawi bawk.