MNYF ṭhalaiin Zoram Mega Food Park Congress insawifiahna turah an ngai

Mizo National Youth Front (MNYF) chuan, Zoram Mega Food Park chu Congress sorkar laia din a nih thu sawiin, insawifiah tur an awm a nih chuan Congress lal chhungkua leh an khàwnbáwlte insawifiahna tur a nih thu an tarlang.

MNYF tarlan danin, Khamranga Zoram Mega Food Park chu cheng vbc. 75 sénga siam a nia sawi a ni a; nimin khan MNYF vice president Zodinpuia hoin MNYF-te'n an tlawh a ni.

Zoram Mega Food Park chu Congress sorkar lai, kum 2013-2018 chhunga din tawh a nih thu sawiin MNYF chuan, "He hmun hi Congress sorkar laia lal chhungkua leh an khàwnbáwl upa mi tlemtêin Mizoram sorkar hnuaia department ṭhenkhat namnûl taka an pal luih aṭanga piang chhuak a ni. MNF sorkarin inhnamhnawihna a nei lo," an ti.

MNF ṭhalaite chuan, Zoram Mega Food Park dinnaah sorkar kalphung mumal tak zawm loa tih a nia sawiin, "Zoram Mega Food Park chungchangah MNF sorkar chuan mawhphurhna a neih kan hre lo. PMKSY scheme aṭangin funding pek a nih avangin Mizoram sorkara nodal department tura ngaihte pawhin vawiin thlengin engmah an hre lo," an ti a; hnathawh endik leh a hmunhma sawngbawl te, enkawltute dinhmunte Mizoram sorkarin a hriatpui lo niin an sawi.

MNYF tarlan danin, Zoram Mega Food Park, Khamrang chu Ministry of Food Processing Industry scheme kaltlanga Zoram Mega Food Park Pvt. Ltd-in an din leh enkawl a ni.