PWD-in Leitan-Sihphir kawng siam dawn

Durtlang Leitan leh Sihphir inkar kawngpui chu cheng vaibelchhe 46.57 sêngin zauha siam­ṭhat a ni dawn a, Mizo­ram PWD kutah dah a ni dawn.

Hemi chungchangah hian nimin khan Border Roads Organisation chuan Mizoram PWD hnenah no objection certificate pe turin Project Pushpak Chief Engineer hriattir a nih thu ziakin Lok Sabha MP C Lalrosanga an hrilh.

Leitan leh Sihphir inkar kawng hi km. 10.25-a thui a ni a, Ministry of Road Transport and Highways chuan kawng zauha siamṭhatna atan cheng vbc. 46.57 a lo ruahman tawh a ni.

Nimin vêk khan Lok Sabha ṭhutkhawmah Bairabi leh Kolasib inkar kawng thlûr hnih (two lane)-a siam nan cheng vbc. 86.81 ruahman a nih thu tarlan a ni a; tun sorkar kum chhunga hmarchhak state hrang hranga cheng vaibelchhe 258 sénga kawngpui hrang hrang km. 56-a thui siam tur project zingah km. 16-a thui Bairabi-Kolasib kawng, NH-154 a tel tih MoRTH minister Nitin Gadkari-a'n ziakin a tarlang tih MP C Lalrosanga'n a sawi bawk.