Tihluihnaa pawisa khawnah MSU puh

Young Lai Association (YLA) Sub-Hqrs, Vaṭhuampui chuan, Dec 7, Nilaini khan Mizo Students Union (MSU) Gen. Hqrs. lam mite'n Vaseikai khuaa dawrkaite hnenah tihluihnain pawisa an khawn tih an tarlang a; thil thleng an dem thu leh a thleng leh a nih chuan na taka action an lak tur thu an puang.

Vaṭhuampui YLA Sub-Hqrs chuan thuchhuah siamin, "Vaseikai hmunah MSU Gen.Hqrs hmingin dawrte kar chhiain, dawrkaite hnenah tihluih­nain pawisa khawn a ni," an ti a; tun hnuah a thlen tawh loh an beisei thu leh, a thleng leh a nih chuan Vaṭhuam­pui Sub-Hqrs YLA-in na taka action an lâk tawh tur thu an tarlang.

Vaṭhuampui Sub-Hqrs YLA chuan, "Kan huam chhunga tihluihna leh tharum hmanga pawisa khawn hi kan duh loh em em, Kristian kan nih anga kan tih loh tawp tur, pawl ang pawha mualphona leh hmingchhiatna nasa tak thlen thei a nih avangin kan hriatpui loha hetiang thil tih hi kan remtih loh thu kan chhuah fo tawh a. Kan ngenna ngai pawimawh loa kan area chhunga hetiang thil a thleng hi kan dem hle a ni," an ti.