Nungcha chunga pawikhawihna zirho

Mizoram State Legal Services Authority (MSLSA), Mizoram Police, Environmental Forest & Climate Change department leh Customs-te chuan nimin khan Assembly Annexe conference hall-ah nungcha chunga pawikhawihna chungchang zirhona (Symposium on Wildlife Crimes) an buatsaih a; Gauhati High Court judge Justice Michael Zothankhuma, MSLSA executive chairman ni bawkin a hmanpui.

Justice Michael Zothankhuma chuan, dan loa ramsa humhalhte hmun danga tawlh leh hralh an awm fo chu pawi a tih thu a sawi a; ram lam nungchaa sumdawnna kalpuite hremna san leh sorkar thuneitute'n mawhphurhna an neihte zir chiang turin kal khawmte a chah.

Symposium hawnna hi MSLSA member secretary R Vanlalena'n a kaihruai a, principal chief conservator of forest RK Singh-a'n ramsa humhalh turin sorkar leh páwl hrang hrang an ṭanho a pawimawh thu a sawi. DGP Devesh Chandra Srivastav pawhin thu sawiin, nungcha hmanga sumdawngte chhui nan Wildlife Custom Forensic Unit din ni thei se a ṭangkai tur thu a tarlang.

Zirhonaah hian mithiamte'n ram lama nungchate humhalh chungchang an zirtir a; Gauhati High Court judge Justice Marli Vankung pawhin thu a sawi bawk.