Speaker-in Zofest 2022 a hmanpui

MZP-in Sialsuk khuaa Zofest 2022 an buatsaih mek chu nimin khan Assembly speaker Lalrinliana Sailo-in a hmanpui a, Zofest souvenir ‘Lailun’ a tlangzarh.

Lalrinliana Sailo chuan, Mizo tih leh Mizoram tih chu rorelna inlumletin a hrin chhuah a nih thu sawiin, "Kan chênna a hran avangin mite’n min hriat dan leh koh dante dang mah se, unau vek kan ni," a ti a; inlâk hranna leh ṭawng hrang hman vanga inthliarnate a tlem zel theihna tura zirlai pawlte hmalakna fakawm a tih thu a sawi.

Ṭhangtharte rilru, hmathlir leh suangtuahnaah thliarkar rilru paih a ngai tih sawiin Lalrinliana Sailo chuan, "Kan unaute chhawmdawlna leh ramri buainaahte sorkar, kohhran leh tlawmngai pawlte thawhhona a lawmawm hle a ni," a ti a; social media hman kawngah fimkhur a ṭul thu sawiin, hnam inpumkhatna atan mi dangte ṭhatna lai inhriatsak a pawimawh thu a sawi bawk.

Zofest hi December 7, Nilaini zan khan minister of state Dr K Beichhua'n a hmanpui a; zaninah a ṭiak dawn a ni.